Davide nabalaka sa mando ni Duterte batok Abu Sayyaf

Gipadayag ni Gob. Hilario Davide III nga angay hunahunaon og makadaghan sa kadagkoan sa Department of National Defense ug Philippine National Police sa dili pa mosugyot kang Presidente Rodrigo Duterte nga makiggubat batok sa Abu Sayyaf Group didto sa Jolo, Sulu.

Siya nabalaka nga kon gubaton sa pwersa sa gobiyerno ang ASG sa Jolo, daghang sibilyan ang maamong ug makalas.

“Ang akong concern ana ang mga citizens gyud, kanang mga civilians, mga innocent civilians nga maapil sa crossfire, dako og tulubagon ana those who will be involved in that gubat,” pahayag sa gobernador.

Si Davide, chairman sa Regional Peace and Order Council (RPOC) 7, namulong niini human ang presidente namahayag nga kon mosamot ang kahimtang, mapugos siya og mando sa military nga gubaton ang Abu Sayyaf didto sa Jolo.

Si Duterte nanghinaot nga dili moabot sa higayon nga kinahanglan na siya mopili sa katapusang option ang pagsakop sa Jolo, giingong lublubanan sa mga sakop sa ASG.

Matod sa gobernador kon madayon ang pakiggubat sa militar batok sa ASG masusama kini sa nahitabo niadtong dekada 70 diin nagsugod ang kagubot sa Mindanao, diin daghang kinabuhi ang nangamatay.

Si Davide nagtuo nga nasulti kini sa presidente tungod sa pagsalig nga dunay igong kapasidad ang Armed Forces of the Philippines ug PNP sa pakiggubat batok sa bandidong grupo.

Dili usab siya uyon nga awtomatiko nga armasan ang mga sibilyan aron mopatay sa mga bandidong tawo.

Apan siya nagtuo nga nasulti ni Duterte nga way tulubagon ang mga sibilyan kon makapatay og mga sakop og ASG agi og pagpanalipod sa kaugalingon ug kon magbuhat og dautan sa ilang lugar.

“Akong sabot ana, nga akong interpretation sa iyang gisulti, although I’m not authorize to interpret what he says, akong tan-aw ana kung naay real danger to your life and naa ang Abu Sayyaf in your presence, then you have the right to repeal it, to fight

back,” pasabot ni Davide. Si Duterte unang nitanyag og P1 milyon sa matag ulo sa nahabiling pito ka mga sakop sa ASG nga gituohang nagtago pa sa kabukiran sa lungsod sa Inabanga, Bohol, atol sa iyang pag-apil sa security meeting sa pagpahigayon sa Association of Southeast Asian Nations niadtong Miyerkules.