4 NAGPUTOS OG MARIJUANA SIKOP

Duha ka mga batan-ong lalake nga mahiligon nga mogamit og marijuana nasikop sa mga sakop sa Talamban police station sa usa ka bakanteng luna sa sitio Nasipit atol sa International Weed day kagahapong adlawa.

Ang mga nasikop giila nga silang Tristan Keith Lavilla, 25, taga Bacolod city Negros Occidental; ug Arnold Campanon, 18, taga syudad sa Mandaue.

Matod ni Sr. Insp. Arieza Otida, hepe sa Talamban police station nga dunay usa ka pulis nga nagpuyo sa sitio Nasipit, Barangay Talamban, nitaho labot sa illegal nga kalihukan sa upat ka mga lalake.

Pagresponde sa kapulisan, naabtan pa nila ang upat nga nag repack sa mga dahon sa marijuana apan ang duha dali nga nakadagan.

Apan kagahapon sa hapon, nasikop sila si Kline Arreglo Ouano, 19, nagpuyo sa dapit ug Jayward Remedio Adolfo, 25, sa mao gihapong dapit.

Di momenos napulo ka kilo sa marijuana ang ilang nasakmit nga gibana-bana nga mokantidad og P70,000.

Giingong gikan sa lungsod sa Balamban ang maong mga tanom sa marijuana nga ilang gipamalit sa tag P10,000 matag kilo.

Nagtuo ang Talamban police nga mga batan-on nga nagpuyo sa maong lugar ang kustomer sa mga suspek lakip na ang mga tinun-an tungod kay duol ra sa usa ka dakung unibersidad sa maong barangay.

“Interview pud nato sa mga residente diri, naay dayo nga moanhi dinhi ari kuno maghithit ug naa pud mga estudyante nga ilang kustomer kay duol ra man sa eskwelahan,” matod ni Otida.

Si kapitan Dario Arcilla sa Barangay Talamban nagkanayon nga dugay na siya nga makadawat og reklamo gikan sa mga residente sa maong dapit nga dunay daghang mga lalake nga magtapok sa bakanteng luna aron manuyop sa marijuana.

Apan igo ra nila badlungon sanglit wa silay makita nga mga ebedensya aron pagsikop kanila.

Gipasabot hinuon sa mga dinakpan nga ilang konsumo uban sa iyang mga higala ang mga dahon sa marijuana nga nasakmit sa kapulisan.

Matod nilang Tristan ug Arnold nga mosalmot sila sa pagselebrar sa international weed day nga naila sa ubang nasud nga 420 diin kadtong mahiligon nga mohithit sa marijuana mosaulog niini. “Mag celebrate unta mi og marijuana appreciation day karon. Gani ang Canada nag celebrate sila karon,” matod ni Lavilla.

Ilang panghinaot nga mahimong legal ang pagamit sa marijuana tungod kay makaayo kini sa pipila ka mga sakit sa lawas.

Wa usab madungog nga makadaot dili susama sa ubang drugas nga gigamit karon sa ubang mga batan-on. / dugang taho ni Audrey Burden CNU Comm Intern

/ Tampo nga hulagway ■ GiSuSi. Ang pulis sa Talamban police station (wala) misusi sa giputos nga marijuana nga ilang nasakmit gikan kanila ni Tristan Keith Lavilla ug Arnold Campanon (tuo nga hulagway). Lain nilang duha ka kauban nasikop sa kapulisan sa follow-up operation.