Mga piniriso nagsuyop

Bisan kon naa na sa isolation cell, laing tulo ka mga priso sa Cebu Provincial Detention and Rehabilitation Center (CPDRC) ang nasakpang nagsuyop og shabu alas 2 sa hapon niadtong Miyerkules.

Sa miaging semana niadtong Miyerkules Santo, upat ka mga bilanggo ang nasakpan nagsuyop usab og shabu sud sa selda numero 25 sa sakop sa Provincial Public Safety Company (PPSC).

Si Gobernador Hilario Davide III naglagot naghunahuna nga bisan sa kahugot sa seguridad nga gipatuman sa CPDRC, makalusot gihapon ang drugas ug ubang kontrabando.

“Maong naglagot bitaw ko naghunahuna naa man untay mga pulis na,” pahayag sa gobernador sa pakighinabi sa mga tigbalita.

Si Davide nangayo na ni CPDRC officer-in-charge Roberto ‘Bobby’ Legaspi og pangan sa mga gwardya nga nag-duty niadtong Miyerkules, tungod kay gusto niya mahibaw-an kon kinsa ang posibleng kakonsabo sa mga priso sa pagpalusot og kontrabando sa provincial jail.

Si Carl Dela Cruz, prison guard 1 ug luyongluyong ni Legaspi, niila sa tulo ka mga priso nga sila si Samole Gabrillo, 33; Rolando Espiritu, 38; ug Arnel Mata, 29; nga pulos nag-atubang og mga kaso may kalambigitan sa kalapasan sa Republic Act 9165 kun Comprehensive Dangerous Drugs Act.

Matod ni Dela Cruz nga nakadungog og kasikas sud sa door 6 sa isolation cell ang gwardya nga nag- duty niadtong higayona hinungdan nga nisumbong dayon kini ngadto nila.

Ug dihang ilang gisusi, ilang naabtan ang tulo nga nag-pot session diin 7 ka gagmay nga pakete sa gituohang shabu ug drug paraphernalia ug laing duha ka gagmay nga pakete nga ginamit na, ang nakuha gikan sa ilang possession.

Si Dela Cruz nidugang nga gibutang sa isolation cell ang tulo aron dili mahilabtan sa ubang mga priso tungod kay nakahimo kini og kalapasan sa ilang patakaran.

Siya niingon nga wa nila gisalikway ang posibilidad nga gilabay gikan sa gawas ug gipingwit sa mga priso ang mga pakete sa shabu tungod kay hugot ang inspeksyon nga ilang gipatuman. /