Easter Sunday
DI gyud unta nako gustong atubangon si Shieryl, talikdan ko siya ug biyaan sa lawn sa akong Lolo ug Lola unya mosulod ko sa balay. Apan naghilak siyang mikupot sa akong bukton aron di ko makalakaw.
“Nganong nia ka?” Pinasingka ang akong tingog. Gitutokan ko pag-ayo si Shieryl ug nagkusmod ko.
“Ikaw gyud ang akong tuyo, Mercy. Daghan kog gustong isulti nimo.”
“Sulti dayon kay mosu’od na ko sa ba’ay.”
Nagyawyaw ko. Gipakita gyud nako kang Shieryl nga nasuko ko niya.
“Nakasa’a ko nimo, Mercy. Gitraydor tika.”
“Nakahibawo na ko ana, uy! Nag-inartista ka sa paghilakno, aron maluoy ko nimo ug di ko ilugon si Gerald nimo? Don’t worry, Shieryl, imo na si Gerald!” Pinabundak ang akong tingog.
“Di kana ang tuyo ko nimo, Mercy. Mianhi ko aron mangayog pasaylo sa pagtraydor ko nimo. Selfish ra ko, uy. Ang akong kaugalingong kalipay ra ang akong gitanDuha mo si Gerald nga nag-antos ug gisakitan sa akong gibuhat.”
Nagpamahid si Shieryl sa iyang mga mata. Nagpadayon siya sa paghilak. Nasuta ko nga wa siya mag-inartista. Tinud-anay gyud ang iyang gipakita nako karon.
“Kanunay nga nagmagul-anon si Gerald. Gusto ko na siyang buhian, Mercy. Tungod ug alang sa inyong gugma.”
“Ayaw ana, Shieryl. Gisulti nako ni Gerald nga duna kay sakit sa kasingkasing. Basig ako pa ang basulon sa imong mga ginikanan kon dunay daotang mahitabo nimo.” Ning higayona, nag-anam nag kahinay ang akong tingog. Nakakontrol na ko sa akong emosyon apan naglagot gihapon ko kang Shieryl.
“Tinuod na, Mercy. May sakit ko sa kasingkasing. Pero ayaw lang mo kabalaka si Gerald. Gidawat ko na ang reality nga di angay ipamugos ang gugma. Nakasabot na ko. Di ako ang para kang Gerald.”
“Ganina, isog kang nagtannako didto sa seawall. Kalit man kaayong nausab ang imong gibati ron?”
“Naghilak si Gerald dihang mibiya na mi nimo ganina, Mercy. Natandog gyud ko kay nagbakho man siya. Naluoy ko niya ug nakamatngon ko sa dakong sayop nga akong gibuhat ninyong duha. Karon, ako na ang naghangyo nimo nga ayaw na paantosa ang inyong kaugalingon.”
Nakatan-aw ko pag-ayo kang Shieryl. Ning higayona, wa na siya maghilak. Nagpahiyom na siya nako.