FISECA mihangyo sa kapulisan sa Talisay City Manindahay sa Tabunok buot nang mookupar sa phase 1 sa new market

Bantay Dagat sa Talisay nga gitawag og Fisheries Sea Ecological Care (FISECA) mihangyo og pulis sa matag higayon sa ilang pagpatrolya.

Samtang, mohangyo usab sila ni Mayor Eduardo Gullas og dakong pumpboat nga makagukod sa mga dagkong ilegal nga panagatan.

Una niini, si Gullas niingon un kinahanglan nga doblehon ang paningkamot sa ilang bantay dagat aron di maabusohan ang ilang kadagatan ug kinaiyahan.

Si Konsehal Jojo Bacaltos, chairman sa committee on agriculture and aquatic recources environmental protection, niingon nga sa pagkakaron igo na ang gidaghanon sa ilang bantay dagat nga moabot sa 15 ka mga tawo nga bahinon sa pag-duty 24 oras.

Gibutyag ni Bacaltos nga aktibo na ang ilang bantay dagat apan usa sa ilang nakita nga suliran mao ang kakuwang sa ilang pumpboat.

Sa pagkakaron, ang Bantay Dagat adunay duha ka mga gagmayng pumpboat.

Mao kini hinungdan nga mihangyo sila ni Gullas nga mahagatan silag dako nga pumpboat aron aduna silay ikasarang sa paggukod sa mga ilegalista.

Si Apple Jane Into sa City Agriculture, niingon nga usa sa ipadangat nga problema sa FISECA mao nga mahadlok sila kon mohimog silag mga seaborne patrol.

Mga manindahay sa Tabunok Public Market mihangyo ni Mayor Eduardo Gullas nga tumanon ang iyang saad nga kon mahuman na ang phase 1 pabalhinan gilayon kini aron mahimutang na usab ang ubang manindahay kon magsugod na ang phase 2 sa merkado.

Una niini, ang mga manindahay gisaaran sa mga opisyal sa Talisay City Hall nga way manindahay nga mawagtang ug maapektohan sa pagtukod sa merkado.

Ang saad ni Gullas nga maghimo silag temporary stalls alang sa mga maapektohan sa pagtukod sa phase 1.

Kon mahuman ang phase 1, butangan gilayon kini sa mga manindahay ug sa higayon nga sugdan ang phase 2 ang mga apektadong manindahay, sila na usab ang mopuli sa temporary stall nga gihimo.

Ang phase 1 nahuman niadtong Abril 8, duha ka buwan nga nag-una sa schedule base usab sa pagsunod sa kontraktor sa gusto ni Gullas nga ipadali ang proyekto.

Apan karong bag-o, si Gullas niingon nga dunganon na ang tanan sa pagpabalhin kon mahuman na ang phase 2 karong Septiyembre 8.

Gipasabot sa mayor nga di maayong dalidalion ang pagpabalhin tungod kay ang iyang gitukod nga Talisay Investment Eeconomic Plan maoy motuon kon unsaon pagpadagan ang bag-ong merkado.

Si Sherwin Echavez, presidente sa mga manindahay, niingon nga kon mao kini ang baruganan sa mayor, nagpakita lang kini nga di maantigo motuman sa iyang saad ngadto kanila.

Giangkon ni City Engineer Gamaliel Vicente Jr. ang unang nasabutan apan nidason nga respitohan ang desisyon sa mayor.