You’re my one and only

Hilom na sab kong naglagot dihang nahunahuna ko si Cherry. Wa gyud siyay pagsalig kang Monsour. Aw, iya gyud tingali kong gipabugnaw kang Monsour aron kon magkabuwag na mi, dako na siyag purohan nga higugmaon sa akong boyfriend. Dako gyud ang akong pagtuo nga nakagusto si Cherry kang Monsour.

Apan mag-antos siya sa iyang gibati kay di man gyud ko motuo sa tanan niyang gipanulti nga biktimahon lang ko ni Monsour aron madugang sa mga babaye nga gipahilak ani.

Nahunong ang akong gihunahuna dihang gikuptan ni Monsour ang akong kamot.

“Tana, Lorna. Manggawas na ta.”

“Ayaw kasuko, ha, Mon.Di pa gyud ko andam sa gusto mong mahitabo. Basig makalimot ta ug mahinayak. Na, di gyud ko makahuman sa akong pag-eskuwela.”

“Wa ko masuko nimo, Lor. Nakasabot ko nimo.”

Nakapahiyom ko ug misunod ko sa akong boyfriend sa paggawas sa sinehan.

Gabii na kaayo sa akong pagabot sa gipuy-an kong eskuwater sa siyudad. Apan daghan pang mga etambay sa dalan labi na sa tindahan. Dunay nanag-inom. Langas ang singal sa hubog sa videokehan.

Naabtan ko si Mama sa gamay namong sala nga nangutaw. Naglabada si Mama aron makaabag kang Papa nga janitor sa usa ka pabrika sa sinilas. Miamen ko kang Mama nga gipaningot. Daot si Mama.

“Natu’og ka na lang unta, Ma.”

“Kinahanglang humanon ko ni sa pag-utaw, Lorna, aron ikahatod ko sa akong mga suki ugma sayo.”

Miginhawa kog lawom. Naluoy ko kng Mama ug Papa. Kon makahuman na ko sa college ug makatrabaho na, mahaw-as ko na sa kalisod ang akong mga ginikanan. “Si Papa, Ma?” “Tua sa kuwarto, gipapahuway ko kay morag gihilantan.

Kaon na. May isda nga tinabonan sa lamesa.”

“Humana kog panihapon, Ma.”

Gikan gud sa sinehan, nangaon una mi I Monsour sa fast food.

Misulod ko sa gamay kong kuwarto. Samtang naghigda ko, nahunahuna ko ang gibuhat ni Monsour nako sa sulod sa sinehan. Unang higayon pa to nga gibuhatan ko niya sa ingon. Morag agrisibo kaayo si Monsour. Maayo gani kay nakapugong ko sa akong kaugalingon ug wa ko siya paundayoni.

Apan sa pagkatinuod lang, nalipay ko sa iyang gibuhat. Nagpahiyom kong natulog. (SUMPAYAN)