Rosaryohan gidili sab?

Hugot natong gisuportahan kining balaod nga nagdili sa tanang mga driver sa paggamit sa ilang cellular phone samtang nagmaneho kini sa sakyanan, mapribado man o pampubliko. Ang RA 10913 o Anti-Distracted Driving Act sugod niadtong Mayo 18 hugot na kini nga gipatuman sa mga hingtungdang ahensiya sa gobiyerno nga gipangoluhan sa Land Transportation Office (LTO) ug sa Land Transportation Franchising and Regulatory Board (LTFRB).

Gibase sa bag-ong balaod mao nga report sa 2015 National Statistics Office nga ang paggamit og cellular phones samtang nagmaneho sa sakyanan maoy usa sa mga hinungdan sa mga aksidente sa kadalanan. Matod pa nga gikan sa tuig 2012 ngadto sa 2014 moabot ngadto sa 1,290 ka nga aksidente sa kadalanan nga ang hinungdan mao ang paggamit og cellphone samtang nag- drive.

Pero mora man og nag- overacting ang LTFRB kay hasta rosaryohan nga isab-it sa rearview nga samin sa sakyanan, sign boards, mga accessories nga gituohang pangpasuwerte i-apil man pod diay sa pagpakuha kay makabalda man usab kuno kini sa panan-aw sa driver. Sagad ra ba sa mga driver o bisan gani ang mga tag-iya og sakyanan ilabi na kadtong mga Katoliko, mobutang gyud og rosaryohan sa ilang sakyanan isip tradisyon o relihuyosong tinuohan.

Sukad masukad wa pa ta kadungog nga dunay nabangga ug nagkabangga nga mga sakyanan tungod sa rosaryohan.

Gidili usab ang pagbutang og signboard sa mga PUJ o PUV. Unsaon man unya pagkahibawo sa mga sumasakay nga ang maong sakyanan paingon sa ilang destinasyon?

Naa hinuoy mga sakyanan nga nagmontar og TV haduol sa driver nga alingogngog ug saba usab kaayo paminawon, wa hinuon iapil sa ilang kampanya nga mao man gyud unta ni numero unong distraction. Pagka way ayo.