Cesafi teams magtigi sa S. Leyte

Lima ka teams sa Cebu Schools Athletic Foundation Inc. (CESAFI) ang magsangka sa St. Isidore Parish Fiesta Invitational Cup 2017 karong Mayo 27-29 sa Saint Bernard sa Southern Leyte.

Gibarugan sa Saint Bernard ang ilang tagline nga ‘The Place Where Champions Meet’ pinaagi sa pagkuha og lig-ong partisipanteng teams nga pangulohan sa CESAFI champions University of the Visayas (UV) Green Lancers.

Gawas sa Green Lancers, ang ubang mokombati sa torneyo mao ang Southwestern University-Phinma (SWU) Cobras, University of San Carlos (USC) Warriors, University of Southern Philippines Foundation Panthers (USPF) Panthers ug University of Cebu (UC) Webmasters.

Ang torneyo modalit og kinatibuk-ang ganti nga P260,000 diin P100,000 ang makuha sa kampiyon, P70,000 sa 2nd placer ug P30,000 sa 3rd placer.

Ang dili makasulod sa top 3 makadawat og P20,000 matag usa.

Nahimong posible ang torneyo sa paningkamot sa mga nag-organisar nga gipangulohan nila ni Mayor Manuel O. Calapre ug St. Isidore parish priest Rev. Fr. Joselito C. Catubig.