MELINDO DIMODEPENSA BATOK PINOY
Tinguha sa bag-ong International Boxing Federation (IBF) junipr flyweight champion Milan Melindo ang usa ka unification bout alang sa sunod niyang tahas ug wala siya’y interes nga modepensa sa iyang titulo batok sa kababayang boksidor.
Mao kini ang nagsilbeng reaksyon ni Melindo sa hagit sa kanhi interim world champion nga si Randy Petalcorin sa General Santos City, kinsa nipadayag dayon sa iyang intensyon nga mo-challenge kang Melindo duha ka mga adlaw human naangkon sa lumad nga taga Cagayan de Oro City ang iyang titulo.
Naangkon ni Melindo ang iyang titulo pinaagi sa impresibong 1st round TKO nga kadaugan batok kang Japanese Akira Yaegashi niadtong Dominggo sa Ariake Coliseum sa Tokyo, Japan.
“Gusto ko og unification bout. Kana bang kasado ang among mga bakos. Nganong unayon man nato ang mga Pinoy?” matod ni Melindo sa iyang pagpakig-atubang sa Cebu media sa iyang paghiabot gikan sa Japan sa usa ka press conference sa St. Mark’s Hotel.
Ang pamahayag ni Melindo gisuportahan sa iyang trainer nga si Edito Villamor.
“Si Milan nakahatag og dungog sa Pilipinas. Bati man kon modepensa siya sa laing Pinoy. Kon daghan seguro ta og world champions, yes, maybe puwede,” matod ni Villamor.
Hinuon gitataw ni Melindo, 29, nga kon usa ka Pinoy ang mahimo niyang mandatory contender, posibleng maahat siya pagdawat sa away.
“Kon mahitabo na, Ginuo na ang magbuot,” batbat ni Melindo, kinsa adunay 36-2, 13 KOs nga rekord.
Sa laing bahin, gipabuhagay sa kampo ni Melindo nga wala sila magdahom nga mapaundang og sayo ni Melindo si Yaegashi, kinsa usa ka threetime world champion.
“Wa mi magdahom nga sayo mahuman ang away kay Akira si a tough champion,” pasabot ni Villamor.
Gipasabot ni Villamor nga nataymingan lang gyud si Yaegashi sa makusog nga left hook ni Melindo nga maoy nagpatumba sa Hapon sa labing unang higayon.
Sa iyang pagbangon, si Yaegashi nakigsinukliay sab dayon og kumo ug alang kang Villamor, ning higayuna nakakiya og oportunidad si Melindo nga humanon og sayo ang away.
Nakapuntos pa og dugang duha ka knockdowns si Melindo una giundan sa referee ang away.