1 PATAY SA BUY-BUST
P1 M DRUGS SA MANAGLAHING RAID
High value target namatay sa ronda sa Mandaue City samtang dul-an sa P1 milyunes nga gidiling drugas ang nasakmit sa managlahing lugar. MANDAUE CITY
Napatay sa mga sakop sa Regional Drug Enforcement Unit sa Police Regional Office 7 ang numero uno sa high value target (HVT) sa tibuok rehiyon 7 atol sa gihimong buy-bust operation gahapon sa kaadlawon. Ang napatay giila nga si Christian Aquino alyas Chan, lumad nga taga lungsod sa Moalboal apan kasamtangan nga nagpuyo sa Bakilid, Mandaue City.
Matod ni Sr. Insp. Windell Abellana, team leader sa RDEU-7, nga atol sa ilang gihimong operasyon, nakabantay ang suspek nga pulis ang iyang gibaligyaan ug mikuha ni sa iyang armas ug miuna sa pagpamusil.
Apan dali nga nakabawos ang mga pulis nga miresulta sa pagkaigo niini nga maoy hinungdan nga gidali ni pagdala sa usa ka pribadong tambalanan sa syudad sa Sugbo apan giingong nakabsan ni sa iyang kinabuhi pipila ka oras ang nakalabay.
Nagsugod ang ilegal nga negosyo ni Chan sa probinsya sa Sugbo ug sa dihang milambo ang iyang pagpamaligya sa ilegal nga drugas miabot na sa mga silingan nga syudad sa Metro Cebu ang iyang supply.
Gawas sa iyang pagka leader
sa grupo siya usab ang mangunay sa pagpamaligya sa illegal nga drugas diin ila pang gisubay kinsa usab ang iyang amo.
“Dugay nato ni nga namonitor in fact nagsugod siya sa provincial level nya na elevate nato into regional level pag abot sa iyang supply sa mga silingang syudad,” matod ni Sr. Insp. Windell Abellana.
Dugang ni Abellana nga dunay mga kaubanan si Aquino nga nakasibat sa operation nga subject sa Ilang follow up operation.
Nakuha sa iyang posisyon ang usa ka kalibre 38 ug mga bala ug duha ka gagmayng pakete sa ilegal nga drugas ug kwarta nga mobalor ug kapin sa lima ka libo ka pesos.
Milutaw ang pangan ni Aquino human masuta nga siya ang kuhaanan sa supply sa mga drug personalities nga nangadakpan sa kapulisan sa nanglabay nga mga buwan.
Daghan na usab nga mga operatiba gikan sa kapulisan sa Central Visayas ang nangita kaniya.
Gisubay pa usab nila kung kinsa nga dakong drug personalities sa Visayas region ang iyang amo.
Tinguha usab nila nga masikop ang mga kauban ni Aquino nga mao usab ang nagpadagan sa illegal nga drugas sa Metro Cebu.
CEBU CITY
Managtiayong negosyante nakuhaan og P1 milyon nga balor sa shabu dihang gi- buybust sa narcotics team niadtong Mayo 24 sa Spolarium St., Brgy. Duljo Fatima, Cebu City.
Gahilak nga gidakop ang magtiayong Emerson Lim, 30, ug Bernadetha, 33.
Nakuha gikan nila ang 2 ka dagkong putos, 1 ka medium nga putos, 5 ka bultong putos, ug laing usa ka putos. Tanan-tanan, nitimbang kini og 300 gramos ug mobalor sa P1 milyon.
Ang managtiayon gimonitor sa Philippine Drug Enforcement Agency (PDEA) 7 sud sa pipila ka buwan. Natigayon ang buy-bust dihang napalitan og usa ka bulto nga nagbalor og P17,000.
Matod ni Leah Albiar, tigpamaba sa PDEA 7, ang magtiayong Lim nalakip sa ilang high value target (HVT). Subay niini, usa ka gwardiya gipusasan human sab nakuhaan og dul-an sa P1 milyon nga shabu buntag niadtong Mayo 24 sa A. Lopez, Mahayahay, Brgy. Calamba, Cebu City.
Si Michael Vallecera, hingkod, gwardiya sa usa ka spa sa Talisay City gipusasan sa mga ahente sa PDEA7 human sa buy bust. Si Vallecera giingong level 2 drug pusher nakuhaan og 200 gramos nga shabu nga mobalor og P700,000.
CONSCOLACION
Nasikop sa kapulisan ang notadong mamaligyaag shabu atol sa buy-bust sa Barangay Pitogo, lungsod sa Consolacion kagahapon.
Giila ang suspek nga si Glennfrey Garces, kansang pangalan nalakip sa listahan sa mga high-value target sa lungsod. Matod ni Senior Insp. Romeo Caacoy Jr., Consolacion Police Station deputy chief, nga top six si Garces.
Nakuha gikan ni Garces ang 19 gramos nga gidudahang shabu ug nagkantidad ang kontrabando og P224,000. /