Martial law sa Visayas gisupak

Si Gob. Hilario Davide III ug ubang opisyal sa Sugbo ningpadayag sa pagsupak sa Martial Law sa Kabisay-an.

Si Davide niingon nga igo na ang pagdeklarar sa Mindanao.

Nakigtagbo siya sa mga Muslim leader dinhi sa Sugbo aron pagtuki sa mga paagi pagsiguro nga dili masudlan ang Sugbo sa mga bandido o terorista nga nagtinguha pagtisok ug kagubot.

Alang sa gobernador kinahanglang tun-an una kini ug maayo, ilabi na kay layo raman dinhi ang kagubot ug malinawon man ang Sugbo ug ubang dapit sa Visayas.

Samtang, wala'y nakita nga rason si Cebu City Mayor Tomas Osmeña nga palapdan pa ni Presidente Rodrigo Duterte ang deklarasyon niini sa Visayas.

Matod sa mayor nga sa pagkakaron, usa ang dakbayan sa Sugbo nga labing luwas nga lugar sa tibuok nasod, diin mas luwas pa kini sa dakbayan sa Davao, pagtandi pa sa mayor.

"I don't see any justification at this point,” si Osmeña kinsa niingon nga kinahanglan usa nga konsultahon ni Duterte ang local government units (LGUs) sa Visayas bag-o kini modeklarar og Martial Law tungod kay lahi-lahi ang gihimo sa LGU aron mamahimong magpabilin nga luwas ang ginsakopan niini.

Si Mayor Kristine Vanessa Chiong ug Mayor Eduardo Gullas uyon sa pagdeklarar ni Presidenti Rodrigo Duterte og martial law didto sa Mindanao.

Ang Marawi giatake karon sa grupo sa Maute gani aduna na'y mga nangamatay nga mga sundawo ug pipila ka mga sibilyan.

Si Mayor Eduardo Gullas sa dakbayan sa Talisay miingon nga tungod sa nahitabo sa Marawi City ang gibasehan sa presidente sa iyang pagdeklarar ug martial law ang tuyo ug tumong mao ang paghunong sa kagubot sa lugar nga maoy nihasi sa mga residente.

Matud pa ni mayor Gullas nga wala'y bisan kinsang Pilipino nga nasuhito sa Mindanao ug hulga sa nasud nga Pilipinas kundi si ang presidente tungod kay taga didto man kini sa Minadanao.