Sekreto sa taas nga kinabuhi ni Lola
Sekreto sa centenarian nga si Lola Faustina Sobiono sa iyang taas nga kinabuhi mao ang pagkahingaon og utanon ug wa na motilaw og karne sud sa 40 ka tuig.
Bisan nga niadto pang Marso 14, ang actual nga adlawng natawhan ni Sobiono gituman ni Lapu-Lapu City Mayor Paz Radaza ang iyang saad nga mohatag og binirtdihan alang sa iyang ika-104 nga adlawng natawhan.
Si Sobiono maoy labing tiguwang nga centenarian sa Lapu-Lapu City.
Nalangay ang pagtunol si Radaza sa iyang naandan nga birthday cash gift alang niadtong mga centenarian sa Lapu-Lapu sanglit niadtong higayona iyang giserbisyohan ang 90 days suspension order sa Department of Interior and Local Government (DILG).
Gilabang ni Radaza ang Hilutungan channel gikan sa mainland Lapu-Lapu paingon sa Barangay Pangan-an usa ka islet nga nasakop sa isla sa Olango diin nagpuyo si Sobiono sa sityo Sung-on, niadtong Miyerkules atol sab sa kapistahan sa maong dapit uban ni Kapitan Virgilio Casiao.
Na-emosyonal ang celebrant sa dihang tingog pa lang sa mayor iyang nadunggan nga nagpa-ingon sa iyang nahimutangan samtang naglingkod sa veranda sa atubangan sa iyang balay, tapad sa iyang puthaw nga sungkod.
Wa makatuo si Sobiono kinsa adunay 53 ka mga apo nga giduaw sa mayor ug nagpunay og hiling sa puwa nga envelope nga maoy gisudlan sa cash gift (kantidad wa ibutyag) sa dihang gitunol sa opisyal ngadto niya.
Gipahibawo sab ni Radaza si Sobiono nga ang rehiyonal nga buhatan sa Department of Social Welfare and Development (DSWD) nga nagpadayon sa pag-validate nga mohatag og P100,000 alang sa mga centenarian.
Asoy sa usa sa siyam ka mga anak ni Sobiono nga si Jovita Cabilao, 59 nga ang iyang inahan maoy kinamaguwangan sa siyam ka managsuon ug siya maoy bugtong nahibilin sanglit pulos na nangamatay ang mga manghod niini.
“Utan ray kina-on nga subakan og sinugbang isda,” butyag ni Cabilao.
Usa sab sa nakahatag og kabaskog sa panglawas sa maong centernarian mao ang way sipyat nga pag-inom og ‘high in calcium’ nga milk powder.
Sa dihang nanamilit na si Radaza ngadto ni lola Faustina game kaayo ni nga nagpaselfie sa iyang wacky pose nga mipabilangkad sa iyang mga paa.