Uyon-supak sa martial law
Samtang uyon ug misuporta ko sa pagpasa entiro isla sa Mindanao sa Martial Law apan dako akong supak kon apilon ang Visayas o entiro Pilipinas. Mamahinong inconsistent ako ning maong baruganan apan aduna akoy igong sukaranan nganong supak ako niining plano ni Presidente Rodrigo Duterte nga i- expand o palapdan ang deklarasyon dinhi sa Visayas. Kay ngano man? Gumikan kay wala may kaguliyang ug kagubot dinhi sa Kabisay-an ig ingon man didto sa Luzon.
Ang pagdeklarar ni Duterte sa Balaod Militar sa Mindanao nasubay kon unsa man ang nalatid sa atong Batakang Balaod. Sa Section 18, Article 7 sa atong 1987 Constitution nagkanayon: "Ang Presidente mao ang commander in chief ug kon gikinahanglan iyang ipatawag ang armadong kusog aron maoy mopakgang sa mga kaguliyang sama sa mga bayolenteng kalihukan, pagpangataki gikan sa gawas nga puwersa, rebelyon ug insureksiyon."
"Gumikan sa maong matang sa kagubot, makadeklarar ang Presidente og martial law sa tibuok o tipik ug kabahin sa nasud sulod lang sa 60 ka adlaw. Gikinahanglan nga mopada og taho ang Presidente, personal o pinaagi sa suwat, ngadto sa Kongreso. Ang Kongreso adunay gahum ang mosuspenso o mobali-wala sa maong deklarasyon. Ang desisyon sa Kongeso dili puwedeng ibaliwala sa Presidente. Puwede sab nga i- extend o lugwayan sa Presidente ang deklarasyon apan nagkinahanglan gihapon kini ug pagtugot sa Kongreso. Samtang ang Korte Suprema puwede usab mo-deklarar nga ilegal ang deklarasyon kon adunay mosang-at ug petisyon sa Labaw’ng Hukmanan."
Adunay sukaranan si Pres. Duterte sa pagdeklarar ug Martial Law sa Mindanao gumikan sa gihimo aning teroristang gropong Maute nga branch sa Islamic State of Iraq and Syria (ISIS) nga pag-ataki ug pag- take over sa Marawi City. Dili basta-basta mitir-mitiran ning maong gropo. Dako ang kadaot nga ilang nahimo sa Marawi City og kon pasagdan lang ni sila, mogara ning mga kanahan.