Atong bantayan
Human nideklarar si Presidente Rodrigo Duterte og martial law sa tibuok Mindanao, daghan na ang nisupak tungod kay wa kuno kinahanglana ang deklarasyon. Kuyaw kuno kini sa abuso sa kapulisan ug military tungod kay sila ang dunay dakong gahum base sa deklarasyon.
Gisuspenso ang writ of habeas corpus, nga nagpasabot masikop ang si bisan kinsang tawo nga mahimong gidudahan nga hulga sa seguridad o mohimo og krimen. Ang langas kaayo mao ang mga grupo nga nagbase sa kaulohan.
Way langas pa ang mga taga Mindanao kay mas gihakop karon sila sa kahadlok sa pagpangatake kay sa pagdeklarar sa president og martial law.
Sa ato pa, mas nabalaka sila sa hulga karon sa Maute ug Abu Sayyaf Group nga nag-alyansa sa mga pagpangatake. Tinuod, angay kabalak-an ang pagsuspenso sa writ of habeas corpus tungod kay mahimo kining abusohan. Pinaagi gud niini, gikinahanglan nga masubay sa proseso sa balaud ang pagdakop sa usa ka tawo.
Ang kahadlok gibase sa panahon ni anhing president Ferdinand Marcos ug sa pagsulti ni Duterte nga mas grabe pa ang iyang pagabuhaton. Sulti pa man gud na niya, tan-awunon pa kon tinuod ba ang iyang gibahad.
Mas maayo tingali nga sa pagkakaron, hatagan og suporta si Duterte sa iyang tinguha nga pagkab-ot sa kahusay ug kalinaw alang sa Mindanao. Sa samang higayon, bantayan siya ug ang iyang mga ginsakpan nga di makapangabuso sa mga tawo.
Sayo pa nga gapuson ang iyang mga kamot tungod kay wa pa gani makita ang epekto.
Angay usab nga timan-an nga lahi na ang sitwasyon karon kay sa panahon ni Marcos. Mas angay usab nga kon dunay mokisi-kisi, ang mga taga Mindanao mismo nga maoy apektado sa problema karon.