Voice of love
Sa akong hunahuna, dunay mga rason kon nganong kalit nga nawad-an kog gana kang John. Usa na ani mao ang iyang pagtamay kang Kevin isip working student labi na nga nakita niya kini nga naglago ang pamiste sa sulod sa campus. Ikaduha, ang pagyanu-yano lang niyag kupot sa akong kamot. Usa ka pagpakita sa iyang kinaiya nga wa siyay respeto nako.
“Gituman gyud nako ang akong giingon nga mamisita ko nimo, Janice.”
Ning higayona, seryuso si John. Ug nakahibawo na ko kon unsay sunod niyang isulti nako.
“I know, John. Ug nasayod na ko sa imong tuyo ron nako.”
Miseryuso sab ko ug miginhawag lawom. Nasayop diay ko sa akong pagtuo nga buotan ug kasaligan nga pagka lalaki si John. Usa ka laing kinaiya nga wa sab nako magustohi niya kay sa akong sabot, di siya mohatag og bili sa mga pobre parehas kang Kevin nga dunay ambisyon sa kinabuhi nga moasenso sa umaabot nga mga adlaw.
“Gusto ko nga makahibawo ka, Janice, nga sa first time pa lang nga nagkaila ta, nakagusto na ko nimo. Na- in-love ko nimo.”
Mikatawa ko. Anang kinataw- nga pinugos ug way kinabuhi.
“I’m very sorry, John. Di ikaw ang laki nga angay kong higugmaon.” Giprangkahan dayon nako si John. Maayo nang samtang sayo pa makahibawo na siya nga wa siyay laoman nako. “Friend? Yes. Magpabilin gihapon nga ilhon tikang one of my friends, Johon.”
Namuwa ang nawong ni John. Wa tingali siya magtuo nga balibaran ko siya sa iyang gugma nako.
“Ang pagkigsuod ko nimo, John, usa lang gyud ka inamigo.” Giunhan ko na si John aron di na siya magduha-duha sa akong desisyon. Gusto ko nga isipon gyud niya nga naggikan sa akong kasingkasing ang pagbalibad ko niya.
“May uyab ka na ba, Janice?”
“Wa pa, John. Nuon, duna na koy secret love. Gimahal nako siya. Di ko gusto nga dunay tawo nga magtamay niya.”
Gitutokan kog dugay ni John. Unya miginhawa siyag lawom. Pagkahuman, nananghid na siyang mopauli. Niadtong gabhiona, gihunahuna ko pag-ayo kon wa ba gyud koy pagbati kang John. Apan nasuta ko sa pinitik sa akong kasingkasing nga wa gyud koy gugma niya. (TAPUSON SUNOD GULA)