Di matag-an ang tawo

CHITO E. GERMINO

Paknaan, Mandaue City, Cebu

Tok! tok! tok! May nanuktok sa pultahan sa balay nga gipuy-an ni Jake. Nadungog niya ang tingog ni Myra. Bag-o lang siya nga migawas sa banyo hu- man naligo. Nagtapis pa siyag tualya nga miabli sa pultahan karong buntaga.

“Moipon na lang ko nimo, Jake, kay wa na man koy kapaingnan!” ni Myra nga nagtibi ang baba; minghoy ang nawong. Nagbitbit siyag bag nga gisudlan sa pipila ka gidalang sinina.

Nahitiurok si Jake nga nagsud-ong sa iyang hinigugma. “Moagwanta man kaha kas akong kapobre! Wa koy trabaho. Way nahumang kuso. Nagsalig lang sa akong uyoan,” ni Jake. .

Tinuod nga wa nay kapaingnan si Myra. Mabdos na siyag lima ka buwan. Gihinginlan siya ni Lola Pina niya nga maoy tag-iya sa balay nga iyang gipuy-an. Gisalikway sab siya sa iyang ginikanan.

“Mas maayo pang burikat kay kanimo, Myra, kay kada bila makakwarta. Ikaw, grabe pa kaysa burikat! Kay nagpakasta nga libre sa lalaking way silbi!” matod ni Lola Pina. Klasmet ni Myra si Jake sa hayskol. Dugay na silang nagkahinigugmaay. Gtadwado na si Myra sa HRM. Unya si Jake igo lang nakahuman sa hayiskol. Wa mopadayon sa koloheyo. Si Myra kasamtangang naghulat sa tawag gikan sa mga kompaniya nga iyang gi-aplayan.

“Di ba nisaad man ka nga kon momabdos na ko mangita kag trabaho alang sa mahimo natong anak?” ni Myra dihang nagdungan silag pamahaw.

“Natural nga suportahan ko kanang atong anak. Edukahon ug disiplinahon pa gyud aron di na magdugang sa mga badlungon sa kalibutan!” ni Jake nga nagpahiyom.

Kalit naigking si Myra. Misikad ang bata sud sa iyang tiyan. “Daw nalipay ang bata sa imong gisulti,” matod ni Myra nga mingisi kang Jake.

“Di na lang ko mamugos nga imong pakaslan,” ni Myra.

“Di lang una ta maghisgot anang kasal. Pero sa tukmang panahon masayod ra unya ka,” ni Jake. “Bilin ka usa dinhi kay may asikasuhon pa ko.”

“Hapit na ra ba ang Valentine's Day,” ni Myra nga mitan-aw kang Jake.

“Mao lagi. Mag-date gihapon ta anang adlawa!” ni Jake nga nagpahiyom.

ALAS OTSO sa buntag, Pebrero 14. Giingnan ni Jake si Myra, “Pag-ilis og pormal nga sapot kay manuroy ta.” Nangadto sila sa opisina sa Local civil registrar ug namirma og ‘application for marriage license.' Hilabihan ang kalipay nga gibati ni Myra nga naghilak.

“Abi ba nakog mahimo kong inahan nga dili asawa,” ni Myra nga migakos kang Jake.

Engrande ang kasal nila. Imbitado ang tanang kahigalaan ug mga paryente ni Myra. Milakdop sa iyang hunahuna nga di gyud lagi matag-an ang tawo. Ang giingon sa iyang Lola nga lalaking way silbi si Jake naliso. Adunahan diay si Jake nga bugtong anak nga nakapanunod og dakong kalubihan. Empleyado ra diay ni Jake ang iyang Tiyo nga maoy nagdumala sa negusyo ug ubang kabtangang napanunod ni Jake. Gipalutaw lang nila nga ang iyang Tiyo Ponso maoy tag-iya sa tanan. (KATAPUSAN)