Ang hataas nga pasensiya ni Melindo (Part 2)

Labaw sa tanan, iyang gihangad ngadto sa Kahitas-an, uban sa mga pangaliya nga unta mabuligan ug magiyahan siya sa saktong dalan.

Miturok ang hataas nga pasensiya nga giubanan sa dugang kakugi ug hangtod nga mipakli ang laing panid sa kahigayonan.

Sukwahi sa niagi niyang mga world title fight, way kasikas ug way igong abiba nga nakuha si Melindo gikan sa iyang mga dumadapig kinsa nagtuo nga sa gihapon kapakyasan maoy mauli niini.

Apan sa hilom, lig-on, positibo ug solidong determinasyon maoy iyang gibawon.

Sa wala pa siya mogikan paingon sa Japan, ang iyang trainer nga si Edito Villamor mibutyag sa mga tigbalita nga ang bintaha ni Melindo mao ang iyang eksperiyensiya batok sa mga lig-ong kontra sama kanila ni Mendoza ug Estrada.

Tuod man, binuligan sa kahigayonan, nahimo ni Melindo ang butang nga wala damha sa kadaghanan lakip na mismo kaniya.

Katulo gyud ka higayon iyang natumba ang three-division champion sa first round aron angkunon ang technical knockout nga kadaugan.

“Sa tinuod lang, ang preparasyon is to win in every round. We’re preparing for the 12 round. Hasta gani ko wa ko makatuo nga maingon ato tong awaya. Taas kaayo ko og respeto ni Yaegashi, threetime division champion gyud to siya,” matod ni Melindo kinsa nagkanayon nga hangtod karon daw sa di pa gyud siya makatuo nga usa na diay siya ka world champion.

Luyo sa nakab-ot nga kampyonato ni Melindo, nagpahipi ang dakong butang ug makahuloganon nga mensahi nga angay himuong sanglitanan sa uban.

Dili sayon nga mohurar sa mga pagsuway. Hatagi og hataas nga pasensiya ang imong kaugalingon. Sagubanga ang tanang pagsuway hangtod makab-ot nimo ang tinudanay nga katuyoan.

Vince Lombardi, a famous American football, once said, ”Winners never quit and quitters never win.”