ROACH WA KAUYON
Wa mahimuot si Freddie Roach sa iyang nakita sa ikaduhang adlaw sa sparring session ni Manny Pacquiao ug mihulagway niini nga maoy pinakabati nga sparring nga iyang nakita sa eight-time division champion.
“His second day of sparring today is maybe the worst I’ve ever seen so far,” pamahayag ni Roach ngadto sa mga media. “His timing is really, really off.”
Ang subsub nga pagtambong ni Pacquiao sa iyang gimbuhaton sa senado maoy usa sa hinungdan kon nganong di kaayo kini makaatender sa iyang ensayo.
Matod pa nga gika-sparring ni Pacquiao ang mga dili inilang local fighter nga sila si lightweight Leonardo Doronio (15-14, 10 Kos) ug super lightweight Sonney Katiandagho (11-2, 6 Kos).
Subling gipasidan-an ni Roach si Pacquiao nga dili angay mokompiyansa sa 29 anyos nga si Jeff Horn sa Australia karong Hulyo 2. Sa uwahing tulo ka mga away ni Horn, pulos iyang na-knockout ang iyang mga kontra.
“He’s dangerous with the right, he’s has a real good right hook, and that’s something that Manny’s been hit with before,” paghulagway ni Roach ngadto ni Horn.
Apan malaumon si Roach nga makabawi ug makuha ra gihapon ni Pacquiao ang sakto ug tukmang kondisyon pipila ka adlaw sa dili pa ang away niini ilabi na og mopahuway ang senado sa ilang trabahuon. Gitumbok ni Roach nga ang speed, footwork ug ang kahanas sa abilidad niini maoy teknik sa pagpukan ni Horn.