Gubat sa Marawi
Madugay ang pagpapha sa mga Maute terrorist sa Lanao del Sur. Kay nagkadaghan matod sa kasaligang tinubdan sa pagsuwat ning lindog. Mahimong mapukan ang Maute terrorist group apan di mapuo.
Kay tubo sila sa Lanao may hataas sila nga gamot sa kaliwat, kadugo ug kahigalaan nga andam motabang kanila o kaha moipon sa ilang kawsa. Kadaghanan kanila gikan sa MILF, matod pa.
Ang nakabug-at sa pundok mao ang pag-apil sa mga langyaw nga mga teroristang taga Indonesia, Malaysia, Saudi Arabia, Iraq ug Syria. Nakita nila sa patayng lawas sa mga terorista. Ang pamarog sa uban mailhan nga langyaw.
Ang Maute group gisugdan sa Maute brothers nga sila si Abdul ug Omar nga pulos may
mga kriminal nga kalihukan. Gikalisangan sila sa ilang dapit sa Butig nga mao karoy ilang headquarter
Kay mga marug utokan nanumpa sa ISIS (IslamicState of Iraq & Syria) aron sila modako ug makabatog dakong pundo sa ilang operasyon. Kuyog sila karon sa ISIS lider nga si Isnilon Tapilon nga taga Abu Sayaff.
Si Isnilon mao karon ang giilang Emir o dako sa ISIS sa Pilipinas ug suportado sa International ISIS. Masabot nga sa gubat naa kanila ang Abus ug pipila sa MILF. Igsuon ang Maute brothers sa asawa ni Abdul Azir kanhi vice chair, sa MILF military affairs.
Husto si Duterte sa pag-ingon nga ang gubat sa Marawi maoy away batok sa mga ISIS nga buot moilog sa Marawi City agig stronghold nila unya sa Asia.kon sila modaog ning gubata sa Mindanao.
Ang pag- imbestigar sa matag bakwit maoy husto sad nga gibuhat sa mga militar. Kahibawo ta sa kamaru sa mga Muslim ug ang ilang pagtamod sa ilang kaliwat. Likayan nila nga mailad sa mga ISIS.
Makapakitbi sa atay ang nahitabo sa atake sa Resorts World diin duol sa 40 ang nangamatay sa lumos sa aso ug sa pagpangambak sa nangaratol. Matod pa sa kapulisan di kuno terrorist act.
Apan nganong giatol man gyud sa kagubot sa Marawi? Coincidence? Okey, kon tinuod. Kay kondi usa na sad ka dakong sukmag sa atong police intelligence network nga dakog gasto sa atong salapi.