LANDSLIDE NA SAB.

Gisusi sa mga personnel sa Cebu City Disaster Risk Reduction Management Office ang usa ka estruktura sa sityo Langob, Brgy. Sirao, bukirang dapit sa dakbayan sa Sugbo, nga apektado sa landslide. Bisan ang ilang sports complex apektado ning labing uwahi nga landslide sukad nagsugod ang pag-uwan.

Nigrabe ang pagdahili sa yuta sa lainlaing dapit sa barangay Sirao human nisugod ang ting-uwan sa pag-intrada sa Mayo.

Karon niapekto na kini sa mga edepisyo sa barangay.

Si Kapitan Felix Limotan nagkanayon nga niining bagong pag-irog sa yuta, grabeng naapektuhan ang ilang barangay stage ug parte sa ilang sports complex. Nihandag na usab ang ilang

water catchment ug pila nalang ka metros maabot na ang dakong liki sa ilang barangay hall.

Si Limotan nagkanayon nga apektado sa pag-irog sa yuta ang Proper Sirao, Tawagan 2, paingon sa Sityo Langub.

Matod sa kapitan nga matag karon ug unya, ang ilang karsada di maagian gumikan sa pagtabon sa yuta ug bato sa barangay road nga ilang gihulagway nga di madala og manomano.

Ang City Government nakapadala na usab og heavy equipment aron maoy mohawan sa karsada aron maagian sa mga sakyanan.

Gitug-an ni Limotan nga wa na niya ipagamit ang sports complex.

Naglaraw usab siya nga ilang iabandonar ang ilang 2-story barangay hall para sa ilang kaluwasan apan naglibog sab sila asa sila mobalhin.

“Karon naigo na among gym, niirag na ang water catchment, stage guba na gumikan aning lihoka sa yuta,” padayag ni Limotan.

Gipahibawo sa kapitan nga ang ilang mga residente kansang lugar naapektuhan sa paglihok sa yuta, nibalhin sa ilang mga kaliwat nga adunay mas luwas nga sitwasyon.

Gihulagway niya nga grabe ang paglihok sa yuta karon sukad niadtong 1997 diin unang nahitabo ang landslide sa barangay Sirao.

Sa niaging buwan, ang usa building sa Bigfoot nga duol sa ilang barangay hall ug gym maoy unang natumba.

Ang Mines and GeoSciences Bureau (MGB) niila sa Barangay Sirao nga dilikado sa landslide gumikan sa kahumok sa yuta ug dali rang molihok kon mag-uwan.

Ang Sirao unang gihamok og landslide pipila na kabuwan ang nakalabay nga nipabakwit sa ilang gatusan ka residente ngadto sa mas luwas nga dapit sa ilang barangay ug karon nibalik na usab ang maong problema apan wala pay massive evacuation nga gipatuman ang barangay. /