Luigi makighimamat sa mga kapitan, tanod

Gikatakdang himamaton ni Mandaue City Mayor Luigi Quisumbing ang mga kapitan ug tanod aron nga higsgutan ang pagpatuman sa mas hugot nga seguridad sa 27 ka mga barangay sa dakbayan.

Sa iyang facebook post, buot ni Quisumbing nga monitoron sa mga kapitan ug tanod ang mga tawo nga kalit nga nibalhin ug nagabang sa ilang tagsatagsa ka mga barangay.

Plano ni Quisumbing nga karong semanaha himuon ang panagtigum apan sumala pa ni city administrator Atty. Danilo Almendras nga maglisod sila niining panahona.

Gawas sa plano ni Quisumbing, si Almendras niingon nga nibisita kaniya ang mga opisyal gikan sa central command kagahapon tungod sa tuyo niini nga ipaubos sa security briefing ang mga kapitan.

“Naay mga taga central command nga niari kaganina, gusto pud unta nila i-brief ang mga barangay captain, so on that regard, I will suggest to the mayor nga siguro usahon nalang para maapil nalang ang mga tanod,” ni Almendras pa.

Kahinumduman nga niadtong Lunes sa hapon, gipatawag sa city hall ug Mandaue City Police office (MCPO) ang mga security officers sa mga mall ug hotel sa dakbayan ug gihisgutan sa maong pagpatawag ang seguridad human sa nahitabong pagpangatake sa Resorts World Manila.

“In light with the recent happenings ang purpose sa pagpatawag sa kapitan ug tanod mao ang paghisgut sa protocol sa security at the same time kung unsay angay nilang bantayan kung naa bay nibalhin labi na kung pulos laki ug naay kahibulungan nga buluhaton,” ni Almendras.

“Our personnel will be on heightened alert, waiting and watching. Please be our partners by reporting any suspicious activities to City Hall or the MCPO ASAP. As always, our offer of a reward for information leading to the arrest of terrorists remains in effect,” hangyo sa mayor sa publiko sa iyang facebook post.