Garbo ni Juico o sa nasod?

Daghang kaspa nga miulbo niining pamahayag ni Philippine Athletics Track and Field Association (Patafa) president Philip Ella Juico nga dili ilakip ang Sugboanon ug top female runner sa nasod nga si Mary Joy Tabal sa Philippine Team alang sa 29th SEA Games sa Kuala Lumpur, Malaysia karong Agusto.

Kini tungod kay wa kuno mosunod si Tabal sa ilang patakaran sa Patafa nga mag- training ubos sa ilang pagdumala didto sa Kaulohan ug ingon man kining pagsalmot niini sa international competition nga wa nila mananghid.

“Ayaw namin sa kanya, ayaw niya sumunod sa amin. Sisirain niya ang buong pamilya, ang community ng sports at ang values na gusto namin ipatupad sa asosasyon.”

Pero yuna ra. Di ba mao man usab kining problemaha ang nasinati ni Tabal sa niaging tuig?

Bisan og ni- qualify si Tabal sa qualifying rounds alang sa Rio Olympics, imbis magmaya nga adunay Filipino runner nga nakahimo niini, ila man hinuong babagan ang probinsiyanong si Tabal tungod sa susamang rason.

Kon ang katarungan sa Patafa mao lang ang pagdili ni Tabal nga mag- training sa Kaulohan, nganong dali ra man lagi kaayo sila maka- accomodate niadtong mga foreign athletes nga didto mag- training sa abroad unya mouli sa Pilipinas aron morepresentar sa nasod sa mga international competitions?

Pananglitan, sama sa laing Filipino Olympian nga si Eric Shauwn Cray, Wa man lagi ni lisodlisora ni Juico ug sa Patafa nga maapil sa RP team. Nia nuoy atong home grown talent ilang kontrahan.

Posibling natandog ang garbo ni Juico ug sa Patafa kay di lagi sila maoy nag- train ni Tabal kinsa nakapakita og saktong labok sa mga international competitions.

Karon ang pangutana. Unsa may atong palabihon, ang garbo ni Juico o ang dungog ug garbo nga natampo ni Tabal ngadto sa nasod? Just asking.