I hold tighter to my faith
(Ikalima sa pito ka mga gula)
Morag di mabuka ang akong baba sa kakugang. Nakatankog dugay sa among katabang.
“Atubangon ba nimo siya, Day Nicole?”
“H-Ha?” Dinhi pa ko makatingog. “Segurado ka ba gyud, Nang, nga si Arnel nang gustong mamisita nako?”
“Ay, oo, Day, uy. Nakaila kaayo ko niya kay magpamisitahan man siya kang Day Belle. Di ba uyab man sila si Day Belle?”
Nakapangawot ko sa akong ulo. Nakapanglingo ko. Tsismosa man diay ning among katabang. Hilom kong nakaingon. Apan giisip ko sab nga husto man nuon siya kay magpamisitahan man gyud kanunay si Arnel kang Belle kaniadto nga duna pa silay relasyon.
“Buwag na sila. S-Sige, Nang. Adtuon ko siya.”
Wa dayon ko mogawas sa akong kuwarto dihang wa na si Nang Meling. Naglisod gyud ko sa pagtuo nga namisita si Arnel nako ron. Ah, duna lang tingali siyay laing tuyo nako. Nakaingon ko sa akong kaugalingon. Unsay iyang pagtuo nako, madala ko niya sa iyang kaguwapo? Kabaga man sab niyag nawong kon mopadayag siya sa iyang gugma nako nga gibuwagan man gani siya sa akong manghod tungod kay duna siyay laing girlfriend?
Seryuso kaayo si Arnel dihang nag-atubang na mig lingkod sa sala. Gitan-aw ko siyag diretso.
“Pasensya, Nicole, kon nakahasol ko nimo ron.”
“Unsa may imong tuyo nako, Arnel? Katulgon na ko, uy!” May kapikal ang akong tingog.
Malipay diay ko nga iya mang gipasakitan si Belle?
“Nakahibawo ko nga masuko ka sa isulti nako ron nimo, Nicole.”
Miginhawag sagunson si Arnel. Klaro nga naglisodo siya sa pagsulti sa gusto niyang isulti nako.
“Sulti na, Arnel, kay matulog na ko.” Way kadasig ang akong tingog.
“Motuo kag di, Nicole, pero kinahanglang itug-an ko kini nimo. To be honest, wa koy uyab. Nagpakaaron-ingnon lang ko kang Belle nga duna koy laing girlfriend aron iya kong buwagan.”
Nadiyong ang akong mga mata nga mitutok pag-ayo kang Arnel.
“Kon tinuod nang imong giingon, Arnel, nganong gibuhat man nimo kini sa akong manghod?” “Tungod nimo, Nicole.” “Tungod nako?” Mikatawa kog kusog. “Are you crazy, Arnel?”
“Wa ko magbakak, Nicole. Dihang gipaila ka ni Belle nako kaniadto, nakagusto na ko nimo.”
Midali ko pagtindog ug gitulisok ko si Arnel. (SUMPAYAN)