Nakat-on og sugal

Dear Noy Kulas,

Maayong adlaw ninyo sa Superbalita. Just call me Lito, 35 anyos, minyo ug dunay mga anak. Kining akong problema parte ni sa akong asawa.

Pagminyo namo or adtong bag-o pa ming kasal wa pa ning problemaha. Diha ra ni nitumaw human siya manganak sa among second child. Nagsugod ra ni sa lingawlingaw ang iyang bisyo sa sugal kay laay kuno kaayo sa balay. Manulong siya og sugal sa among suod nga silingan aron magpalabay sa panahon. Ako lang siyang pagahatagan og ginagmay hangtod nga mo demand na siya og dako-dako. Dinhi na ko niuntol ug maoy rason sa among mga lalis.

Kaniadto sa uyab pa mi, ang akong asawa dunay trabaho. Pero niundang siya human momabdos sa among first child kay nagkasabot mi nga siya ang mangunay og atiman sa among mga anak kon gagmay pa. Karon gusto na siyang motrabaho ug manguha mi og yaya. Noy, maayo kaha nga manguha mi og yaya aron makabalik siya og trabaho? Maundang kaha siya sa pagpanugal kon motrabaho na siya? Tambagi ko unsay maayo nakong buhaton. LITO Lit,

Basin ang pagpatrabahog balik niya makatabang nga maundang siya sa pagpanugal. Basin naingon ana siya tungod sa kalaay sa balay bisan kon naa ang inyong mga anak. Kana labina gyud kon ang imong asawa mao ang tawo nga di mahimutang kon way kaestorya. Kana bang sociable kaayo, mangita og mga tawo o pundok nga ikakukabildo.

Pagkuha na lang mo og yaya aron makabantay sa inyong mga anak. Gasto tuod na pero kon ang pagpatrabaho sa imong asawa usa ka paagi nga makaputol anang iyang nagkagrabeng pagpanugal, patrabahoa na lang siya. Basta magsabot mo nga moundang siya sa iyang pagpanugal kon makabalik na siya og trabaho.

Lisod kon pasagdan ang problema sa pagpanugal kay sagad sa mga tawo nga naanad na, mangita na niini. Way sugal nga di gastuso. Gastuso ang pagpanugal. Ang nakapait kay ang sugarol di makamatngon nga mas dako na siya og pilde kay sa daug. Mao na nga kadtong igo igo rag income, mapordoy gyud. Gikinahanglan ang diha-diha nga aksyon nianang inyong problema.