Pistola nga gibilin

Panadtaran, San Fernando, Cebu

Suod sila si Jose ug Eking sukad pa niadtong mga gagmay pa silang bata. Hangtod nga na-hayiskol na sila, sila gihapon ang suod nga managhigala. Dinhi sa ilang balangay sila kanunay magkuyog sa pagpanirador og mga langgam sa banika. Duna silay paboritong pahuwayanan ug kini mao ang pangpang nga nag-umbaw sa ilang balangay. Inigka human nilag panirador adto sila mamahuway ug mag-estoryahay ug unya mangatawa kon ila nang hisgutan ang mga dalagita nga ilang naibgan. Siya ( Jose) naibog kang Alma, samtang si Eking nakagusto kang Merla, ilang mga klasmet sa elementarya. Sa maong pangpang malantaw ang patag, ang simbahan, ang munisipyo ug ang halayong dagat.

Ug karon, human sa pagpanglabay sa daghang katuigan, nausab na ang dagan sa tagsa-tagsa nila ka kinabuhi. Siya ( Jose) nahimong usa ka agriculturist ug dunay dakong umahan dinhi sa ilang balangay. Bahin kang Eking, wala siya mahibawo kon unsay naabot niini. Pero nakurat siya dihang gusto si Eking, pinaagi sa selpon, nga makigkita kaniya sa kanhi nila pahuwayanan sa mga bata sila – ang pangpang nga nag-umbaw sa balangay.

“Kumosta ka, King?” timbaya ni Jose sa higala dihang nagkita sila sa pangpang. “Ug nganong nahibawo ka sa numero sa akong selpon?”

“Okey lang, Joe. Maayo ka, da, kay imo gyung gigamit ang imong propesyon,” ni Eking nga nagpahiyom. “Si Merla ang naghatag nako sa imong numero, Bay. “

“Ikaw, King, unsa diay imong nahuman?” matod ni Jose.

Gihunghong ni Eking ang iyang tubag ngadto sa dunggan ni Jose. Nahitalunong si Jose nga mitan-aw sa nawong sa higala.

“Mao na, Bay Joe. Unsaon man, mao man niy akong kapalaran! Usa ka tawong mokutlo og kinabuhi sa tawo, sa mga tawong dagkog sala, sa mga badlungon pod sa katilingban...” Miigham si Eking unya mipadayon, “Wa sab ko magdahom, Joe, nga maingon ko ini... nga mahimong usa ka hitman.”

“Daghan ka nag napatay, Bay King, kay hitman ka man?” ni Jose.

“Ubay-ubay na. Mao ni gibuhi ko sa akong pamilya. Pero, mao lagi, Bay Joe, kuyaw kaayo. Gamayng sipyat, tipi sab ka.” Mitan-aw si Eking sa halayong dagat.

Wala na motingog si Jose. May gikuha si Eking gikan sa iyang hawakan, usa ka pistola kalibre .45.

“Mao nay imong kargada, Bay King?” ni Jose.

“Duna pa koy long arm, tua sa balay. Pang long distance to,” tubag ni Eking. “Kuan diay, Bay, akong ibilin nimo kining akong pistola. Molahos man god ko sa amo sa Alcantara, unya daghan kaayong checkpoint maagian. Peligro kaayong masikop ta.”

“Okey ra, Bay, nga ibilin nimo ang pistola nako. Pero, kay hapit na man ang mahal nga adlaw, kuyog unya ta... mag-penitensiya ta didto sa Holy Mountain,” matod ni Jose.

Mitutok si Eking kang Jose. “Okey, Bay Joe! Way problema na. Gusto sab kong magbag-o. Hugasan ko ang akong kasalanan didto.”

Mipahiyom si Jose. Gidawat niya ang pistola nga gitunol ni Eking kaniya. Unya dali nga mibiya si Eking.

Nianang pagka sunod adlaw mao na lay nahibaw-an ni Jose nga patay na si Eking. Nakit-an ang patayng lawas niini sa kalibunan duol sa usa ka subdibisyon. Ang kapulisan nagpadayon pa sa ilang imbestigasyon kon kinsa ang mamumuno ug unsay motibo sa pagpatay. May sabot ra ba sila si Eking nga moadto sa Holy Mountain sunod semana. Ang bungtod mao ang sakripisyuhanan sa mga tawo nga dunay dagkong sala.

Pag-abot sa Biyernes Santo gilubong ni Jose ang pistolang gibilin kaniya ni Eking sa kawayanan sa luyo sa iyang balay. (KATAPUSAN)