Natural products professionals nag-abot sa USC Talamban campus

Nagkatapok ang mga tigdukiduki ug tig-ugmad sa mga produktong natural alang sa kagamitang sayantipiko ug pamatigayon sa University of San Carlos (USC) Talamban Campus ning bag-o pa lang alang sa ilang ika-21 nga panagtigom.

Ang tinuig nga panag-abot sa Natural Products Society of the Philippines (NPSP) nibandera sa temang “Integrating Efforts in the Utilization and Commercialization of Natural Products.”

Ang Natural Products Research Group sa USC Chemistry Department maoy mipasiugda sa kalihukan nga ang keynote speaker mao si Dr. Jaime C. Montoya, Ph.D., executive director sa Philippine Council for Health Research and Development (PCHRD).

Gilangkoban ang panagtigom sa mga siyentipikanhong mga sesyon nga may labot sa biodiversity, biochemistry, biotechnology, microbiology, natural products development, natural products chemistry, pharmacology, toxicology ug sa standardization of research practices.

Matod ni Dr. Ramon del Fierro, Ph.D., auditor sa NPSP nga mao sab ang lead organizer, mipahigayon sila og usa ka focus session kabahin sa guso uban ni Dr. Ross D. Vasquez sa University of Santo Tomas (UST).

Gipa-ambit ni Vasquez ang iyang natun-an kabahin sa

brown seaweeds nga matod niya may lawom nga kagamitan alang sa mga industriya sa tambal, cosmetics ug pagkaon.

Gipasundayag sab ni Del Fierro ang pagtuon sa pipila ka mga tanom nga nagtubo sa Sugbo kansang mga duga nasuta sa iyang mga kaubanan sa USC Tuklas Lunas Development Center nga may gamit nga anti-hyperglycemic and anti-microbial.

Natukod ang NPSP sa tuig 1986 aron mahimug-atan ang mga pagtuon sa Chemistry ug Biology nga nagtutok alang sa malungtarong paggamit sa mga produktong gikan sa mga natural nga kapanguhaan, matod ni Del Fierro, kinsa mao sab ang dean sa USC School of Arts and Sciences.

Katuyuan sa tinuig nga panagtigom nga mag-ambitay ang mga ginsakopan sa kapunungan sa ilang mga gipang-tunan, ug makipaghisgot sa susama nilang mga tigdukiduki.

Tumong sab sa panag-abot nga madasig ang mga sakop sa kahugpongan nga makigtambayayong alang sa mas abanteng pagduki ug dugang kauswagan sa natad sa mga produktong natural.