Forum bahin sa prostate cancer, libreng screening
Subay sa pagsaulog sa Hunyo isip “Buwan sa Kaamgohan Kabahin sa Kanser sa Prostate”, giawhag ang publiko sa pagtambong sa usa ka forum karong Hunyo 10 ug libreng screening karong Hunyo 17, pulos adlaw nga Sabado, diha sa Vicente Sotto Memorial Medical Center (VSMMC).
Mga doktor nga sila si Rizalito Catipay, Edwin Lim, John Mata, ug Ernesto Cabahug maoy mamulong atol sa forum sa auditorium sa VSMMC alas 8:00 sa buntag hangtud alas 11:00 sa buntag. Ang maong mga doktor pulos urologists ug consultants sa VSMMC.
Sa laing bahin, ang screening sa kanser sa prostate (nga sakit sa mga lalaki), nga magsugod alas 9:00 sa buntag hangtud sa alas 2:00 sa hapon, pagahimuon sa Out-patient Department (OPD) sa VSMMC.
Ang duha ka kalihokan gipasiugdahan sa VSMMC, Philippine Urological Association, Biomedes, ug ang Ramon Aboitiz Foundation Inc.-Eduardo J. Aboitiz Cancer Center (RAFI-EJACC).
Datos gikan sa RAFIEJACC Metro Cebu Populationbased Cancer Registry nagpakita nga sa mga tuig 2008-2102, may 332 ka mga kaso sa kanser sa prostate sa Sugbo diin 240 kanila wala maluwas, o 72.29 porsiyente sa tanang kaso. “Daghang mamatay sa prostate cancer bisan kon dali ra kaayo magpa- screen ug dili mahal ang magpahiling. Sa tanang matang sa kanser, ang sa prostate maoy pinakasayon untang tambalan,” pulong ni Ronald Delos Reyes, RAFIEJACC program coordinator.
Nitambag siya sa tanang mga lalaki nga nag-edad 40 anyos pataas nga mopailawom kada tuig sa screening bahin sa prostate aron magsuta sa kaluwasan niini.
Nidugang siya nga ang yawi sa paglupig sa kanser sa prostate mao ang sayong pagkamatikod, nga mahimo kon kanunay magpahiling sa ilang lawas sa doktor. “Dili lisud pagtambal sa
prostate cancer. Kasagarang kaso naa na sa mga nag-edad 55 hangtud 70 anyos. Apan angayan nga magsugod og pahiling sa edad pa lang nga 40 anyos,” ingon ni De los Reyes.