NBA vs. Marawi

Usa ko ka frustrated nga basketbolista. Frustrated pud ko nga balibolista. Frustrated pud ko nga siklista. Frustrated ko sa tanang sports kay wa koy talento ini.

Niadtong Martes, samtang pwerte nang lingawa sa mga tawo nga nagtan-aw sa Game 5 sa NBA, naghinumdom ko niadtong bata pa ko nga gipugos ang kaugalingon nga makat-on og basketbol. Tanan sa among barkada mobasket gawas nako.

Hawod ko sa klase, honor student, leader sa mga school projects. Apan sa basketbol, wagtang tanan nakong power, itoy pa ko sa tanang itoy. Ang tinuod, ako ang official water boy kon manung nag basket ang barkada sa pikas barangay.

Kausa, dili kompleto ang team, kuwang og usa kay daghan sa barkada ang wa mitunga. Di sab pwedeng moatras mi kay naka-schedule na man ang duwa. Abi pa lang ningtalaw.

“Duwai lang Insoy bi,” giingnan ko nila. Ug ambot unsay nasud sa akong utok nga diretso man kong mitando. “Sige, hadlokon,” mitubag ko. “Basta alihi lang gyod ang kontra ha,” miingon ang usa sa barkada, “duphi, gukdang bola, iloga, kon makuha nimo ipasa dayon namo.”

Sa dihang nagduwa na, wa koy laing nahimo kon di magdagan-dagan sa korte, magdupa-dupa sa kontra, apan wa gyod ko kahikap og bola. Di pud ko pasahan sa akong mga kauban bisan pa og abli kaayo ko nga motira.

Naay termino sa basketbol nga “flower.” Kon tawgon kag “flower” pasabot ana wa kay gamit sa duwa, pangkompleto lang ka sa korum, adorno ra ka morag buwak. Di nako malimtan tong adlawa nga ako nahimong usa ka maanyag nga Gumamela.

Paghuman sa Game 5 niadtong Martes, tanan sa opisina nahimong basketball analysts. Kay di man ko kasabat sa istorya, panglawgaw na lang akoa.

OFFICEMATE: Maglisod og pugong ang Cavs ni Durant oy.

AKO: Grabe bitaw si Durant. Lain ato, hapit na baya mahurot ang mga Maute sa Marawi.

OFFICEMATE: Mao ba? Nag-lisod gyod sila. AKO: Ang Cavs? OFFICEMATE: Ang military. Planohon gyod unta na nilag maayo.

AKO: Morag Golden State, lami kaayog game plan.

OFFICEMATE: Lagi no? Katong pagkapildi nila, relax man gud kaayo sila ato. AKO: Ang military? OFFICEMATE: Ang Golden State. Morag gituyo kuno to nilag papildi.

AKO: Mao kuno. Pero katong naunay ang military sa ilang airstrike, wa tingali to tuyoa oy.

OFFICEMATE: Grabe pud og gituyo to oy. Salbahis na gyod kaayo sila ana. AKO: Ang Golden State? OFFICEMATE: Ang military… Gibinuangan ko nimo bai?

AKO: Lain ato ba, kato kunong mayor sa Bohol nga gipatay…

OFFICEMATE: Bahala ka diha oy, ari na ko.