Ang kargador kong amahan
Niining buntaga nakailis na ko sa akong T-shirt ug purol, andam nang mo-eskuyla sa publikong elementarya duol sa among barangay dinhi sa siyudad. Nagdungan mig pamahaw si Papa Kardo nga nagdalag pansit ug mga puso. Kargador siya sa merkado publiko sa Carbon. Mogikan siya sa alas tres sa kaadlawon ug modalikyat pagpauli sa among barungbarong inigka alas siyete sa buntag nga magdala sa among pamahaw. Human namog pangaon mobalik dayon siya sa Carbon aron pagpangarga hangtod na sa alas dose sa udto.
Halos magkadungan mi si Papa pagpanglakaw matag alas tres sa kaadlawon, kay usa ako ka newsboy sa Superbalita gikan sa kaadlawon hangtod sa alas siyete sa buntag. Isuroy ko man ang mga hulad sa Superbalita sa akong mga suki nga tindera ug tindero sa Carbon. Ang kita ko sa pagpamaligyag Superbalita nakabangkilya sa akong alawans sa pag-eskuyla. Dose anyos na ko ug naa na sa Grade 6. Pait kaayo ning way inahan! Nakaingon ko sa hilom. Matod ni Papa, dos anyos pa ko nga gibiyaan sa akong inahan tungod kay kargador ra man ang akong amahan. Mitug-an si Papa nga ang akong mama mikuyog sa usa ka traysikol drayber ug tua sila manimuyo sa usa ka lungsod sa habagatang Sugbo.
Ug ning buntaga karon namatikdan ko nga mibisita na sab si Noy Joe kang Papa Kardo. Si Noy Joe among silingan sa eskuwater nga mahigalaon sa mga molupyo sa among lugar. Paspas kaayo ang iyang asenso sa kinabuhi uban sa iyang pamilya. Nakapatukod na og bag-ong balay nga dos andanas ug nakapalit na sab og bag-ong awto. Hilom kong naminaw sa ilang panagsultianay..
“Ayaw pag-antos sa imong pagka kargador sa Carbon, Bay Kardo! Unyang gabii adtoa kos balay aron makasugod ka sa gitanyag ko nimong trabaho, aron maharuhay na mo sa imong anak nga si Arnel,” matod ni Noy Joe. “Ang bata nag-antos sab pagpamaligyag Superbalita aron may ikabawon siya sa eskuylahan. Luoy baya.”
Mitingkag ang akong mga dunggan nga naminaw sa tanyag ni Noy Joe sa akong Papa. Lalim bay maharuhay na kuno mi sa Papa!
Apan nahisagmuyo ko sa tubag ni Papa Kardo nga nasawod sa akong pandungog.
“Kuntento na man mi si Arnel ning among kahimtang, Bay Joe. Nalingaw kos akong pagka kargador ug si Ariel okey ra man siya nga momata sa kaadlawon aron mamaligyag Superbalita sa Carbon ngadto sa iyang mga suking tindera ug tindero,” ni Papa Kardo nga wala mosanong sa tanyag ni Noy Joe.
“Okey. Pero kon gusto ka gyung makatilaw og haruhay nga kahimtang, adtoa kos balay sa alas utso sa gabii,” ni Noy Joe nga huyhoy ang abaga nga mibiya sa among barungbarong.
Nianang pagka gabii nagubot ang eskuwater nga dapit diin kami nanagpuyo. Ang hinungdan kay gironda sa kapulisan ang balay ni Noy Joe. Binulto ug pinakite nga shabu ang nasakmit sa mga alagad sa PDEA ug kapulisan. Nadakpan si Noy Joe ug laing pito ka drug pusher nga andam na untang mo-deliber sa iligal nga druga.
Nahibulong si Papa Kardo dihang mi-apir ko sa iyang kamot karong gabhiona. Nakadayeg man god ko sa iyang kaligdong ug sa kalig-on sa iyang baruganan, nga magpabiling kargador sa Carbon Market, bisan pa man sa tanyag ni Noy Joe kaniya sa dinaliang panguwarta, nga mao ang tig-deliber diay og shabu. Sus, maapil unta sa pagkasikop ang kargador kong amahan kon miadto pa siya sa balay ni Noy Joe ning gabhiona.