NAMATAY SA ATAKE KAY GIPUGOS?

PAPA SA SAKSI SA KASO NI MAYOR BONIEL GIINGONG GI-PRESSURE

Giingon nga tungod sa pres- sure, giatake sa kasingsing ang amahan sa boatman ug eyewitness nga si Riolito “Etad” Boniel, kagahapon sa kaadlawon, susamang adlaw usab sa adlawng natawhan sa asawa niini.

“Giatake sa kaguol. Naguol siya nako nga naingon ani ko,” si Etad dihang nahinabi sa tigbalita kagahapon.

Ang amahan ni Etad nga si Remigio, 65, nakabsan sa kinabuhi atol usab sa pagbalhin ni Bohol Provincial Board Niño Rey Boniel sa Talibon District Jail kagahapon sa alas 4:00 sa kaadlawon.

Subay niining nahitabo sa iyang amahan, matod ni Etad nga di siya moatras sa kaso ug sa giatubang nila karon.

Gipanghimakak usab niini ang pasangil sa kampo ni PB Boniel nga gipugos siya sa pulis nga mosaksi.

Ang hepe sa Regional Intelligence Division (RID) 7 nga si Sr. Supt. Jonathan Cabal nagkanayon nga mamahimong manubag ang kampo ni PB Boniel kon makita sa ilang imbestigasyon nga gi-pressure ang amahan ni Etad nga mo-testigo alang kanila.

“Pinapaimbestigahan pa natin, but initially sabi satin na pini-pressure nga ng kampo ni Boniel yung tatay na kombinsihin yung anak to testify for them,’ si Cabal nagkanayon.

Dugang niya nga giingong gi-pressure ang amahan sa testigo nga mobali sa iyang una nga testimonya ug motestigo kini nga anaa sa Dubai ang padayon nga gipangita karon nga si Bien Unido Mayor Gisela.

Si Cabal nipasabot nga tactic sa kampo ni PB Boniel ang pasangil nga naa sa Dubai ang mayor aron mawagtangan og kridibilidad ang mga testigo.

Gipahibawo usab niini nga naa ubos sa witness protection program sila si Etad, Edgar Tapere, ang driver ni PB Boniel ug si Randel Lupas.

Gipanghimakak hinuon sa kampo ni PB Boniel ang pasangil nga gi-pressure nila ang amahan ni Etad.

Matod ni Atty. Gerry Carillo, usa sa abogado ni PB Boniel nga naadmit daan sa tambalanan ang amahan ni Etad dihang nibisita ang usa sa abogado sa akusado sa balay ni Etad.