SANTO PAPA NAKADAYEG SA SUGOD REHAB

Samtang padayon ang pakiggubat sa puwersa sa kagamhanan batok sa Maute Group didto sa Mindanao, ang gubat sa Artsidyosesis sa Sugbo batok sa gidili nga drugas nagpadayon usab.

Si Fe Barino, usa sa mga nagpasiugda sa Surrender to God (SuGod) Program, niingon nga mas nadasig siya nga ipadayon ang nasugdan nga programa pagtabang nga makabangon ang mga kanhi nagumon sa gidili nga drugas human niya personal nga nahimamat si Pope Francis didto sa Roma niadtong Mayo 31, 2017.

“That is very important,” ang gisulti sa Santo Papa kang Barino sa pinulungang Italyano nga gihubad ni Padre Jan Ray Limchua, Sugbuanon nga pari nga atua nangalagad sa Roma, uban sa paghikap sa mga kamot niini.

“Mura kog naglutaw sa langit. Dili masabot akong gibati. Wala ko katingog,” paghulagway ni Barino sa iyang gibati sa Superbalita Cebu human sa ilang panagtagbo ni Pope Francis.

Siya didto sa Roma aron pagtambong sa ika-50 nga anibersaryo sa International Golden Jubilee sa Catholic Charismatic Renewal Movement sa tibuok kalibotan.

Si Limchua nga iyang nakasakay sa eroplano, ang nangita og paagi nga makaduol siya sa Santo Papa.

Karong Hulyo 3 hangtod sa Hulyo 8, himuon ang ika 9 ka higayon nga SuGod Recovery and Renewal Program (SRRP).

Kini magsugod alas 8 sa buntag hangtod alas 5 sa hapon sa Love of God Center sa Barangay Yati, lungsod sa Liloan.

Sukad gisugdan ang SRRP, niabot na og 546 ka mga drug

addict ang nakatambong sa programa diin 416 nila kay nakahuman. Ang mga nanambong kay nag-edad gikan 12 hangtod 65 nga gikan sa lainlaing mga dapit sa lalawigan sa Sugbo.

Kasagaran nila kay nakagamit og shabu.

Human sa ilang pagtambong sa SRRP, padayon ang ilang recovery pinaagi sa pagtambong og SuGod Continuing Care Program (SCCP) nga himuon katulo matag semana sa lainlaing drop-in centers nga gidumala sa mga SuGod Volunteer Recovery Companions.

Gawas sa programa, nagtukod usab og Halfway House ang grupo ni Barino diin pipila ka mga kanhi adik ang nagpuyo ug nagtrabaho alang sa ilang pagkaon ug programa.

Si Barino nidugang nga human sa ilang panagkita ni Pope Francis nakaingon siya nga nalipay ang Ginuo sa ilang gibuhat ug usa kadto ka timaan nga ang SuGod natukod subay sa kabubut-on sa Labaw nga Makagagahom.

Ang SuGod usa ka pribado nga kalihukan nga gidumala sa mga tawo nga boluntaryo mihalad sa ilang serbisyo alang sa ilang gugma sa Ginoo ug sa ilang isig-kaingon.

Usa kini ka faith-based program nga giila ug gipaluyohan ni Arsobispo Jose Palma, isip tubag sa Simbahan sa problema sa drugas.

Ang SuGod, kabahin sa Cebu Archdiocesan Program for Drug Dependents (CAPDD). /