Reclamation project sa Minglanilla
Si Mayor Elanito Peña sa lungsod sa Minglanilla gipatawag sa kadagkuan sa Department of Environment and Natural Resources (DENR) sa kaulohan alang sa ilang gi- apply nga Environmental Compliance Certificate (ECC) alang sa 100 ka ektaryang reclamation project.
Matod ni Peña nga niadtong miaging buwan didto sila sa kaulohan alang sa usa ka interview sa DENR.
Iyang gibutyag nga atol sa ilang panagtagbo, nag-abot usab sila ni kanhi Presidenti ug karon Manila Mayor Joseph Estrada tungod usab sa reclamation project niini.
Hinuon, wala pay resulta sa interview apan malaumon siya nga mauyonan ra kini kon dili karong tuiga hayan sa sayong bahin sa sunod tuig.
Wala magtuo si Peña nga mas dali ug makakuha dayon silag ECC karon nga lahi na ang secretary sa DENR nga di na si Gina Lopez.
Naglaum si Pena nga mauyonan na kini tungod kay mao nalang kini ang ilang gipaabot aron masugdan na ang ilang reclamation project.
"Ang ECC mao na lang gyud, mao nalang ang gipaabot namo, kung naana ni diritso na (for implementation)," matod ni Peña.
Ang proyekto sa lungsod Public Private Partnership sa Ming Mori Development Corporation (MMDC) nga mogasto og P5 bilyones.
Si Peña miingon nga kon mahuman lang ang proyekto 75,000 mil ka mga tawo ang makatrabaho diin apil sa makatrabaho kadtong gikan sa ubang lungsod ug siyudad.
Kini tungod kay usa man kini ka industrial estate nga mag- promote sa turismo ug magdani og langyaw ug lokal nga mga magpapatigayon.
Ang gikinahanglang mga dokumento mao ang detailed feasibility study, Environmental Impact Study and Engineering Geological ug Geohazard Assessment.
Niadtong miaging tuig, napahigayon na ang public hearing ug didto nasuta nga aduna usay mga molupyo ang nisupak tungod kay maguba ang kinaiyahan ug mawagtangan usab sila og panginabuhian nga mao ang pagpanagat.
Apan ang mga opisyal sa MMDC mipasalig na nga ilang sulbaron ang maong isyu.
Sa miagi usab nga tuig, ang mga opisyal sa lungsod ug ang MMDC nagpinirmahay na og memorandum of understanding uban sa Philippine Reclamation Authority.
Ang maigo sa proyekto mao ang mga barangay Tulay, Tungkil ug Calajoan, diin gibanabana nga moabot sa 3,000 ka pamilya ang maapektohan.