Fake rice, news ug babaye
Ambot og unsa nay nahitabo ning atong katilingban karon? Daghan na kaayong fake. Dunay fake rice, fake news ug fake nga babaye. Nagtuo tang original nga babaye apan bayot diay. Usahay maglibog nata kon unsa-on pag-ila aning mga peke. Sama aning fake rice nga matod pa gipamaligya sa Bantayan Island nga nakadaot sa mga tawo nga nikaon. Unsa-on nato sa pag-ila kon dili ka hiniti o expert nga motino ani? Kon malung-ag na ning klase sa bugas, dili na ta makaila kon tinuod ba nang bugasa.
Okey lang nang fake nga butang sama sa mga sinena, sapatos ug mga borloloy sama sa alahas nga morag gold apan dili diay. Apan kon makaon na sama aning bugas dilikado kaayo. Plastik kuno ni. Mao nga magbantay gyud ta.
Kining mga fake news sab nga mikatap karon sa social media. Kon dili ka magbantay sa pagbasa, posible nga mailad gyud ka ug motuo. Mao na ni ang resulta sa pagsulbong sa teknolohiya ug social media nga si bisan kinsa na lang ang makapagawas ug mga opinyon ug inpormasyon bisan walay igong basihanan ug sukaranan.
Samtang ang social media nakatabang sa daling pagsabwag og mga inpormasyon pero angay kitang magbantay kay kining mga tawo nga nagpakatap ning maong matang sa inpormasyon, tinuod man o dili, walay responsibilidad ug kredibilidad. Ang mainstream media, radyo, telebisyon ug pamantalaan adunay responsibilidad o katungdanan nga mopagawas sa tukmang inpormasyon gumikan kay aduna man silay responsibilidad ug kredibilidad nga gipanalipdan.
Kinsa pa man ang maminaw, motan-aw ug mobasa kanila kon magpataka lang sila pagpagawas og sayop nga mga inpormasyon? Mawala na ang ilang kredibilidad. Mao nga ang mainstream media mao gihapon ang credible source sa mga inpormasyon. Unsa-on pag-ila ang fake
news? Kon makasugat mo og kadudahan nga balita sa social
media ayaw dayon ninyo tuhui o ipakatap hangtod nga imong nasuta. Ang news organizations adunay social media accounts sama sa Facebook ug Twitter o ilang kaugalingong web page. Puwede ninyong ma- check diha. Ayaw sa dayon ninyo i- share hangtod nga inyong makompirmar.