Mas kasaligan

Sa pagsugod pa lang ni Presidente Rodrigo Duterte sa iyang termino sa miaging tuig, iya nang gilampaso sa iyang mga pagpamulong sa publiko ang Estados Unidos. Iya ning gisaway tungod kuno sa pagpanghilabot sa mga kalihukan sa Pilipinas. Samtang nagsige siya og saway sa Estados Unidos, iyang gidayeg ang China. Iya kadtong paagi alang sa diplomatikanhong pakigbalik sa relasyon tali sa China ug Pilipinas nga nabuak human iloga sa China ang Scarborough Shoal ug nisamot dihang nipasaka og kaso ang miaging administrasyon batok sa China sa kasungian labot sa West Philippine Sea. Nisamot og kainit ang away human modaog ang Pilipinas. Apan pag-asumer ni Duterte, naninguha siyang mahiuli ang relasyon sa duha ka mga nasod. Nilampos siya sa iyang lakang.

Ang wa mabuhat sa miaging administrasyon, nahimo sa administrasyon karon. Nikalma ang China batok sa Pilipinas.

Bisan sa pagpanaway ni Duterte, ang Estados Unidos pabiling nagsuporta sa Pilipinas,labina sa modernisasyon sa kasundalohan pinaagi sa paghatag og mga armas ug modernong mga gamit sa gubat.

Sa away sa armadong kusog batok sa Maute, makita ang importanteng papel sa Estados Unidos pinaagi sa spy plane nga nagsigeg lupad ibabaw sa Marawi city. Duna pay mga hinabang nga hilom nga gihatag ang nga Kano. Sa gubat karon, asa man ang China? Di ikalimod nga ang nasod nagsalig sa Estados Unidos sulod na sa daghang mga dekada. Ang doktrina ug mga sistema sa armas gikan gihapon niini.

Busa, bisan unsa pay buhaton sa Presidente, nakagamot na ang mga Kano sa atong sistema sa depensa. Di man tuod siya gusto, apan ang iyang kasundalohan naghangad gihapon ni Uncle Sam.

Sa hulga sa terorismo, diha usab makita nga mas kasaligan ang mga Kano kay sa mga Insik.