Balik-Islam

Di pa dugay aduna koy nakahinabi nga usa ka heneral sa kapulisan nga nangutana, “Padre nganong daghan mang mga sakop sa ‘Balik-Islam”? Kining “Balik-Islam” mga kanhiay Kristohanon nga nagpakabig sa relihiyon sa mga Muslim. Wa ko katubag sa iyang pangutana apan nakapamalandong ko, ilabina atubangan sa panghitabo sa Marawi ug uban pang mga lugar sa Pilipinas nga may kisaw ang mga radikal nga Muslim nga mopahamtang og kaugalingong teritoryo (“Caliphate”) diin ang tanan pugson nga mahimong Muslim.

Sa tinuoray diyotay ra ni sila ug dili angay basulon ang tanan natong mga igsoong Muslim. Gani adunay nakasulti pod nako nga pulis mahitungod sa usa ka pulis nga Muslim kansang batan-ong anak nadani niining mga terorista ug siya mismo dili na tuohan sa iyang anak. Silasila mismong mga Muslim nagkagubot tungod sa terorismo. Dili pod nato hikalimtan nga didto sa Marawi may mga Muslim nga mingtabang sa ilang mga silingan nga Kristohanon .

Balikan nato ang “Balik-Islam”. Ngano man ni? Sa akong tan-aw, ang uban niini nadani sa kuwarta nga ilang nadawat sa dihang nagpakabig sila, sama sa atong madungog didto sa Saudi Arabia. Dako ni nga sala kay gipuli nila ang ilang Kristohanong pagtuo sa salapi.

Apan di lang ni. Makahinumdom ko sa usa ka OFW nga akong nakahimamat. Nagpabilin siyang Kristohanon apan gisuginlan ko niya nga ang iyang mga kaubang Muslim sa Saudi Arabia di makasabot kon nganong gitugotan sa Ginoo nga patyon ang iyang bugtong anak. Dili nila madawat nga gibatunan sa Ginoo ang atong tawhanong kahimtang. Huyang ra ang maong Dios. Morag dili makahatag og seguridad. Tingali nangita og seguridad ang mga nakabig sa Balik-Islam.

Sa ebanghelyo ni Mateo, gihisgotan ang duha ka matang sa kahadlok: kahadlok sa tawo ug kahadlok sa Dios. “Ug ayaw kamo kahadlok sa mga nagapatay sa lawas, apan dili makahimo pagpatay sa kalag,” nagkanayon si Jesus. Midugang siya, “…hinunoa, kahadloki ninyo siya nga makahimo paglaglag sa kalag ug lawas didto sa Gehenna.” Ang Ginoo mahimong molaglag sa kalag ug lawas didto sa Gehenna, kun impiyerno. Siya ang atong tinuoray nga siguridad.

Dili diay ni tinuod nga huyang ang Ginoo. Gihatagan lang ta niyag higayon ug modawat sa iyang kaluoy diha ni Jesus, iyang Anak nga nahimong tawo. Kini dili masabtan sa mga Muslim bisan gitahod nila si Jesus isip propeta.

Kining siguridad nga atong gipangita makaplagan lamang sa Dios. Sumala pa ni propeta Jeremias ang Dios kusgang manlalaban nga maoy mobawos sa atong kontra alang kanato. Kon basahon nato ang sulat ngadto sa mga taga-Roma, makita nato nga wa nay mas gamhanan pa kay kang Kristo: pinaagi sa usa ka tawo – si Kristo – ang sala ug kamatayon nga misulod sa kalibutan pinaagi sa usa ka tawo – si Adan – gilupig na sa grasya sa Dios diha kang Kristo.

Ang gikinahanglan diay “Balik-Kristohanon.”

Binasi sa Jeremias 20:10-13; Salmo 69; Taga-Roma 5:1215; ug Mateo 10:26-33