From the bottom of my heart
Bugnaw ang hangin. Hapon na ug nagkisdom ang langit kay baga ang dag-om. Apan wa mouwan. Nagpahayahay ko sa among terrace.
Two storey kini. Nagtan-aw ko kanila ni Jay ug Layna nga nagduwa og badminton. Naa sila sa dakong lawn nila ni Jay. Silingan mi si Jay ug bisan pa ani, di mi suod. Di kaayo motagad si Jay nako. Igo lang siyang motan-aw nako kon magkita mi.
Kon magkasugat mi ug moingon ko niyag, “hi!” igo lang siyang motubag og, “hello!” Di gani siya motan-aw ug mopahiyom nako. Nakaingon ko nga garbuso siya. Apan kon duawon siya ni Layna ug magduwa silag badminton, malipayon kaayo siya. Dako kaayo siyag katawa. Usahay mobahakhak siya.
Sa akong pagtuo, managhigugmaay silang duha. Inigkahuman nilag duwa og badminton, magtupad sila sa pagyaka sa Bermuda grass samtang magpamahid sila sa ilang singot sa face towel. Unya hatdan silag juice sa katabang nila ni Jay.
Ingon ani ang kanunay kong makita nilang duha every Sunday parehas karon. Sa buntag sa Domingo ko manimba, ug kanunay kong makita sila si Jay ug Layna nga magkuyog nga manimba sab sa maong oras. Nagpuyo mi si Jay sa F. Ramos ug sa Sto. Rosario church ko manimba nga mao say simbahan nila ni Jay ug Layna.
Nakugang ko kay kalit nga mipaka ang linti nga gisundan sa kusog nga dalugdog. Mibundak ang uwan. Nagdagan ang duha nga misulod sa balay nila ni Jay. Nakapangiyugpos ko kay mihuros ang bugnaw nga hangin. Napiskan og salibo sa uwan ang akong nawong. Nagdali kong mibiya sa terrace ug misulod ko sa akong kuwarto.
Dihang mihunong na ang uwan, mibalik ko sa terrace. Gikan sa akong nahimutangan, nalantawan ko sila si Jay ug Layna nga migawas sa balay nila ni Jay. Gihatod ni Jay si Layna hangtod sa gawas sa ilang gate. Mihunong ang taksi nga gipara ni Jay. Daplin sa karsada ang among balay. Misakay si Layna. Mibalik si Jay pagsulod sa ilang lawn. Nakatan-aw siya nako. Gipahiyoman ko siya apan wa siya mopahiyom nako.
“Garbuso gyud! Morag guwapo!”
Nagbagutbot kong mibiya sa terrace. Makalagot gyud si Jay. Esnabero kaayong dako!
(SUMPAYAN)