Si Papa Fred

Nalingaw ang managsuong Divine, Aby ug Xavier karong buntaga nga mihigop sa sabaw sa linat-ang tiil sa baboy. Nahibung sila kang Papa Fred nila nga wa mobiyahe kagabii. Sama sa naandan matag Sabado sa gabii mobiyahe ang ilang amahan padung sa Davao sakay sa barko. Dominggo karon atol sa pagsaulog sa adlaw sa mga amahan.

Apan gikalipay sa mga anak ni Fred nga wa siya pagbiyahe. Nahibawo sila nga abunda ilang pagkaon kon anaa ang ilang amahan uban kanila. Sama karong buntaga nga mitubod ang ilang singot nga naghigop sa sabaw. Ug aduna pay sinugbang baboy. May pakapin pang bugnaw nga sopdringk Busa kanunay silang mangandoy nga tumanon ni Papa Fred ang sugyot ni Mama Minda nila.

“Fred, undanga na kanang pagbiyahe mo sa Davao. Anhi na lang sa ato ipadayon ang imong negusyo,” sugyot ni Mama Minda nila.

“Di puyde, Day Minda. Daghan pang plano nako nga gusto kong matuman,” tubag ni Papa Fred nila.

Suwerte ang mga anak ni Fred nga adunay taas nga panglantaw ang ilang amahan sa ilang maayong kaugmaon. Mao nga kayo marino si Fred sa iyang negusyo. Damgo ni Fred nga makabaton og bagong balay. Dili na siya kumportable sa giabangan nilang balay sa Kamagayan. Naghuot sa daghan nilang aplayanses.

Gusto na sab mobiya si Fred sa Kamagayan, ilabi na nga ulitawo na si Xavier ang kinamanghuran niyang anak ug bugtong lalake. Hadlok si Fred nga makahikap si Xavier sa tsiks sa Kamagayan. Alang kang Fred dili kalikayan ang tentasyon. Siya gani nga na- glikay sa mga tental usahay ganahan man sa tentasyon. Ug ang tsiks makahikap niya.

“Papa Fred, nganong wa man ka mobiyahe?” usisa ni Xavier sa iyang amahan.

“Aduna kitay adtuon karong hapon, Dong Xavier, kitang tanan,” ni Fred.

“Asa man kita padung, Pa Fred?” pangutana ni Divine.

“Mangadto kita sa Hipodromo, Day Divine,” ni Fred.

Wa na lang mangutana si Aby alang sa dugang kasayuran. Nahibawo siya sa lihok ni papa Fred niya. Hibawo si Aby nga adunay maayong plano ilang amahan aron malipay silang managsuon kon di kini mobiyahe. Sama niadtong miaging tuig nga wa mobiyahe ang ilang amahan. Gidala silang tanan sa SM. Sa ilang pagpauli nagbitbit na sila tagsa-tagsa og laptop.

Gidayeg sa tulo ka magsuon si Papa Fred nila. Bisan igo ra kining nakatapos sa elementarya, aduna kiniy trading nga negusyo. FM Trading Inc., ang ngalan sa kompaniya ni Fred. Opisina ug computer ray puhunan niya. Mga butang nga orderon sa mga kliyente ni Fred aduna siyay suplayer aa lain-laing nasod. Nasunod ni Fred ang negusyo sa amo niyang Amerikano. Tig lang siya sa opisina ug sa maayo niyang pagpangalagad, gisalig kaniya ang negusyo hangtod gihatag kini kaniya sa hingpit sa dayon nang pauli niini sa Amerika.

“Day Minda, mga anak, manglakaw na ta. Ania na ang trak nga kargahan sa atong mga butang,” agda ni Fred sa iyang pamilya.

Wa makatingog ang asawa ug mga anak ni Fred sa iyang pag-agda. Wa silay nahimo gawas sa pagsunod.

Didto sa Hipodromo nakurat sila sa ilang gihunongan. Usa ka matahom nga balay. Nakita nila ang catering service nga nangandam sa pagkaon. Diha na pod ang pari nga maoy mobendisyon sa bag-o nilang balay.

“Day Minda, mga anak, bunga kini sa akong kahago,” ni Fred nga luhaan ang mga mata.

“Papa Fred, Happy Father's Day!” pulong sa mga anak ni Fred sa tumang kalipay. Miduol si Minda ug migakos kang Fred. (KATAPUSAN)