Rookie bag-ong lider sa Lakers
Gitahasan sa bag-ong presidente sa Los Angeles Lakers nga si Magic Johnson ang ilang No.2 overall pick sa miaging National Basketball Association (NBA) Rookie Draft nga si Lonzo Ball isip bag-ong lider sa 16time NBA champions.
Si Johnson mitudlo sa bungbong sa practice court sa Lakers diin nagsangit ang siyam ka mga numero nga giretiro sa team dayong sulti kang Ball: “I’m going to put a little pressure on you right now. You look to your right, there’s some jerseys hanging on that wall. We expect a Ball jersey hanging up there one day, all right? Good.” Gipabuhagay ni Johnson nga sa iyang pagtuo, ang 19 anyos nga rookie mao ang makagiya kanila paingon sa naandan nilang gimbuhaton kaniadto – manghakot og mga titulo.
“The new face of the Lakers, the guy who I think will lead us back to where we want to get to,” paghulagway ni Johnson kang Ball.
Nagkanayon si Ball nga malipayon siya sa iyang pagkahiluna sa Lakers ug naghinamhinam na siyang moduwa sa team. “I’m happy to be home, and I’m ready to get to work,” matod ni Ball.
Ang pagkuha ni Ball mao ang usa sa mga plano ni Johnson aron palig-unon og balik ang puwersa sa Lakers nga nagkaguliyang human miretiro ang kanhi nila lider nga si Kobe Bryant.
Aron mahatagan og luna si Ball, gi- trade sa Lakers ang ilang sinaligang pointguard nga si D’Angelo Russell ngadto sa Brooklyn Nets.
“I’m going to do what it takes to get the right players in here with the right mindset,” pasabot ni Johnson.
“D’Angelo is an excellent player. He has the talent to be an All-Star. We want to thank him for what he did for us, but what I needed was a leader. I needed somebody also that can make the other players better, and also that players want to play with.”