Minglanilla daog sa Game 1

Gipasutoy sa host Minglanilla Archangels ang ilang opensa sa 2nd quarter aron paghimo’g agianan paingon sa 74-68 nga kadaugan batok sa Dalaguete AgriSaurs sa Game 1 sa best-of-three South Division Finals sa 2017 Cebu Governor’s Cup Inter-Cities/ Basketball Tournament niadtong Biyernes sa Minglanilla Sports Complex.

Si Jiesel Tarrosa maoy nangulo sa pagsilab sa opensa sa Minglanilla sa 2nd quarter. Ning maong quarter gimugna ni Tarrosa ang 16 sa iyang kinatibuk-ang 29 puntos.

Sa halftime, ang Minglanilla nakaposte na og 47-37 nga labaw.

Nagpadayon ang kainit sa Minglanilla sa 3rd quarter ug ilang nainat ang ilang labaw ngadto sa 60-46.

Hinayhinay nga ningkamang ang Dalaguete hangtod nga nakaduol sila pagbalik, 68-73, sa nahabiling 53.7 segundos.

Apan wala ra nakalahutay ang Dalaguete hilabi na kay nakuwangan na sab sila sa oras nga makabangon.

Karong gabii, moasdang ang Minglanilla sa balwarte sa Dalaguete dala ang tinguha nga tiklupon og sayo ang series.

Gilauman nga kulbahinam kining engkuwentruha gumikan kay ang suporta sa mga tumatan-aw naa man sa Dalaguete ning higayuna. Puntos matag usa Minglanilla (74) – Tarrosa 29, MG Nebril 12, Eredera 9, MJ Nebril 9, Mangaron 6, Quimson 4, Sellote 3, Pepito 2, Mantillas 2 Dalaguete (68) – Sangoyo 20, Selerio 13, Basallo 8, Delgado 7, Pagula 5, Pintor 4, Rosales 4, Barola 3, Buenconsejo 2, Villahermosa 2.