PACQUIAO ANDAM NA
Andam ug nagpanikad na si Filipino boxing icon Manny Pacquiao sa iyang pagpakigbatok kang Australian Jeff Horn karong Hulyo 2 sa 55,000- seater Suncorp Stadium sa Brisbane, Australia.
Masaligon ang kampo ni Pacquiao nga mopatigbabaw ang kaabtik ug kasinatian sa Pambansang Kamao sa Pilipinas ning awaya. Nagkanayon si American trainer Freddie Roach nga kuntento siya sa gipakita sa fighting senator sa training.
“Best I’ve seen him in a long time. He was able to bring out the explosiveness, the combinations, etc. Really, really good to go,” matod ni Roach sa interbyu sa www.abs-cbnnews.com.
Sa kinatibuk-an, miabot og 118 ka rounds ang gisagubang sa 8-division world champion sa sparring session.
Nagkanayon si Roach nga sulod sa duha ka mga higayon nga gitumba ni Pacquiao ang iyang Mexican sparring partner, timailhan nga nagpanikad na kini.
Ang Australian sparring mate ni Pacquiao nga si George Kombosis nagtuo nga dili makahuman sa unom ka rounds ang iyang kababayan ning awaya.
“His speed, his experience, his movement is just way above. I think it will end within 6 (rounds), not more,” batbat ni Kombosis.
Ning awaya, depensaan ni Pacquiao ang iyang World Boxing Organization (WBO) welterweight title.
Kagahapon sa udto, migikan na si Pacquiao paingon sa Brisbane kauban ang kapin sa 200 ka mga tawo sa iyang delegasyon.