Mireklamo sa bugas humay ipatawag ni Mayor Radaza

Ipasusi ni Lapu-Lapu City Mayor Paz Radaza ang tindahan nga maoy gipalitan sa usa ka babaye sa usa ka sako sa bugas diin ang nakapalit nagduda na fake rice.

Si Delia Alegado, taga barangay Basak, Lapu-Lapu City, nidangop sa sibyaanang dyAB Cebu aron sa pagreklamo sa iyang napalit nga usa ka sako nga bugas nga nagkantidad og P1,780 nga adunay marka nga “made in Pakistan”.

Gipasubay na sab ni Radaza pinaagi ni Basak barangay kapitan Isabelito Darnayla ang maong reklamante aron personal nga mahinabi sa mayor kabahin sa iyang reklamo ug aron masuta kon diin nga tindahan niya napalit ang maong bugas.

Gitahasan sab ni Radaza ang market administrator sa pagsubay sa maong tindahan diin gipalit ang bugas.

“Kinsay iyang (Alegado) gipalitan? From there mag- start ang atong investigation,” matod pa sa mayor atol sa press conference.

Apan nagduda si Radaza nga posible nga di kadto peke nga bugas sanglit nagkalainang matang sa bugas ug posible sab nga kadudahan ang hitsura depende sa pagluto niini.

Gisaysay pa ni Alegado nga iyang gilinugaw ang bugas ug gibutangan og mga rekado alang sa arroz caldo.

Sa pagkabugnaw sa maong lugaw, gisud kini sa refrigerator aron di madaot ug sa dihang initon na unta, nahibubong ang ginang nga nahisama sa maja blanca ang hitsura.

Nisamot ang iyang kakurat nga sa iyang pagkandos naingon og mga lusok sa styrofoam ang grano sa lugaw hinungdan nga wa makaon sa iyang pamilya.