Hasulon sa iyang tanlag
Usa sa gibasihan sa mga abogado ni Bohol Provincial Board Member Nino Rey Boniel nga dakong buhi ang iyang asawa nga si Bien Unido Mayor Gesila Boniel mao ang pamahayag sa usa ka society writer sa Bohol Chronicle nga si Raul Gatal nga nagka-estorya sila ni Gesila pipila ka oras human "patya" ang mayor. Matod pa ni Gatal nga iyang gitawgan ang cellular
phone ni Gesila anang gabii mga 18 oras ang nakalabay human gidagit ang mayor. Ug matod pa ni Gatal "mitubag" kaniya ang mayor human niya gipa-ngumusta. "I am okey. We will just
talk," matod pa ni Gesila. Ambot og madawat ba kini sa korte isip ebidensiya sa depensa? Apan matod pa sa usa ka batid nga psychic nga posibleng ang nakig-estorya ni Gatal mao ang espirito ni Gesila. Kay matod pa dili mawala ang espirito sa usa ka tawo mga 40 oras human siya mamatay. Aw, kon ato usab nga tuhuan ang pamahayag ning maong
psychic, patay na diay si Gesila kay nganong migawas o mipatim-aw man ang iyang espirito.
Bisan ako maglisud og tuo aning mga estorya sa espirito ug kalag kay mag-53 anyos na ko ning kalibutan wala man ko makasinati niini personal. Ang mga estorya nga ingon niini ako man lang nadunggan o nabasahan ug makita sa salida sa sine.
Pero adunay mga tawo nga gitugahan og mga abilidad sama aning mga psychic, paranormal nga mga tawo o kanang adunay
third eye nga maka-estorya o makakita og mga tawong kahibulungan. Kon ato kini silang estoryahan dili ta makasabot kanila ug gani ma-aan pa nato kini sila nga nayabag. Pero mao lagi kon tuhuan ba kini sila sa korte.
Kon ang denial ug alibi o panghimakak gihulagway sa Korte Suprema nga huyang nga klase sa ebidensiya gawas kon mamatud-an pinaagi sa lig-ong ebidensiya, unsa na kaha kining ebidensiya kabahin sa espirito ug kalag? Pero kon aduna man gani kalag ang tawo, wala siguroy krimen nga dili masulbad sama aning pagpatay ni Mayor Boniel.
Kay ngano? Aw, ang kalag ni Mayor Boniel maoy maghamok sa iyang bana. Dili kaha mo-surrender ug moangkon si Bokal Boniel kon matag gabii dili siya makatulog kay makita ang dagway sa iyang asawa? Kana bang hasulon siya sa iyang tanlag.