Di magpadala

Dihang nakigkita ang mga lider sa mga Muslim sa Marawi City sa Maute group atol sa walo ka oras nga ceasefi niadtong Dominggo, lakip sa ilang mga demanda mao nga ang Moro Islamic Liberation Front (MILF) maoy makigsulti kanila. Ikaduha mao nga buhian nila ang ilang bihag nga pari nga si Fr. Teresito Suganob bugti sa pagbuhi sa ilang ginikanan ug mga kabanay nga naa karon sa kustodiya sa kagamhanan human masikop.

Kakuyaw kon uyonan kini sa kagamhanan kining ilang mga demanda.

Kon ang gobiyerno mouyon bisan sa una nilang demanda, di kini makaayo sa imahe sa kagamhanan tungod kay maora na hinuon og huyang ang kagamhanan.

Di baya dehado ang sitwasyon karon sa gobiyerno. Nagkagamay na gani ang lugar nga giukopahan sa mao nga grupo ug gilibutan na sila sa mga sundawo. Nganong ihatag pa man ngadto sa MILF ang pagpakigsabot?

Mosamot kabati ang imahe sa kagamhanan kon buhian ang mga sakop sa pamilyang Maute.

Bisan tuod kon mahinungdanon ang kinabuhi sa tawo, apan kon ang kinabuhi tumbasan og daghang kinabuhi, malisod na kini.

Kon uyonan ang Maute group sa ilang gusto, kadakong usik sa mga kinabuhi nga giula aron mahimong hingpit nga gawasnon ang Marawi. Mahimong kawang ang ilang pagsakripisyo.

Inay uyonan, ipakita sa kagamhanan ang kalig-on ug way kahadlok nga pagresolbar sa krisis nga gisugdan sa teroristang grupo.

Kon hatagan pa silag laing kahigayunan, unsa may garantiya nga di sila momugna og laing kagubot, sama sa ilang gihimo sa nanglabay nga katuigan? Usa ra ang makahunong ning tanan, itahan ang ilang mga armas ug mo- surrender sa kagamhanan. Kana maoy garantiya sa kalinaw.