From the bottom of my heart
Nahunahuna nako nga kinahanglang modesisyon ko. Si Ronnie naglaom na nako, nga sugton ko siya. Ngano man sab nga nagpakaaron-ingnon man ko, uy, nga sweet ngadto niya? Unsa man say nasulod sa akong ulo nga gusto ko mang palaguton si Jay? Sus, maglagot kaha siya?
Mibiya man gani siya sa ilang terrace ug nag- holding
hands pa sila si Layna. “Kining, Ron, sori gyud kaayo, ha. Kadtong pagdip-ig ko pag-ayo nimo, wa to magpasabot nga nakagusto na ko nimo. Wa mausab ang feeling ko nimo. Inigsuon ra gyud ang pagtagad ug pagbati ko nimo.”
“Sa ato pa diay, Malou, wa gyud koy paglaom nimo?”
Mitando ko. Unya nakaduko ko. Wa ko makatan-aw og diretso kang Ronnie. Sa tanaw gud nako niya, kahilakon siya. Kon love ko pa lang siya, di gyud nako siya paantuson. Apan mao lagi, di gyud katudloan ang kasingkasing.
“Unta, Ron, mosabot ka na this time. I’d try my very best to love you but I failed.”
“Unta makita mo ang laki nga para gyud nimo, Malou.”
“Manghinaot sab ko, Ron, nga makita mo ang girl nga para gyud nimo.”
“Di na tika hasulon, Malou.”
Mitan-aw kog dugay kang Ronnie. Nalipay ko sa iyang giingon.
“Salamat, Ron, nga nakasabot ka nako.”
“Friends lang gihapon ta, ha, Malou.”
“Oo, uy.” Nakapahiyom ko. “We’re still friends.”
Gihatod ko si Ronnie kutob sa gawas sa among
gate. Dihang nakalakaw na siya, nakapanghupaw ko. Nahunahuna nako nga suwerte ang babaye nga mahimong girlfriend ni Ronnie. Sa dugay nga panahon sa among panagkaila ug sa iyang pagpangulitawo nako, nasuta ko ang iyang kabuotan. Naanugnan ko sa iyang gugma nako apan ang pinitik sa akong kasingkasing maoy akong gisunod.
Di maayo sa usa ka relationship between man and woman nga pinugos.
Gituman gyud ni Ronnie ang iyang gisaad nako. Wa na siya maghasol nako. Mihunong na siya sa pagpangulitawo nako. Nakaginhawa kog luag. Wa na sab ko maghunahuna kang Jay. Para sa unsa pa man? Duna na siyay girlfriend, si Layna. “Wa gyud ko masayop, no, Malou. Love ang imong gibati ngadto kang Jay.”
Nagkaestorya mi si Carol usa ka buntag ana. Gitando ko siya.