Mibalik si veronica
Mokuyog ka diay kang tiya nimo Rufa sa Manila, Ver?” matod ni Ricoy kang Veronica. Dinhi sa balangay sa Buwak Antuwanga walay wa mahibawo sa relasyon nilang Ricoy ug Veronica. Alang kang Ricoy, si Veronica mao ang iyang unang gugma; ingon man si Veronica ngadtong Ricoy. Sa ilang panuigon karon maingon nga dili pa kaayo bug-at ang mga saad nga ilang giluwatan sa usag usa. Si Ricoy disisayis anyos pa lang ug si Veronica kinse anyos.
“Oo, Coy. Gusto man god ni Tiya Rufa nga makatabang kong Tatay Amboy. Wala na goy trabaho si tatay. Ug si Nanay Luisa nanglabada lang. Motabang ko niya usahay,” hinay nga tingog ni Veronica nga morag dunay tilimad-on nga dugay na unya sila nga magkita ni Ricoy.
“Nakasabot man ko, Ver. Pero ang akong gikahadlukan basin makakita ka unyag lain didto nga maoy ipuli nimo nako,” ni Ricoy nga mipasarap sa iyang panan-aw sa palibot sa bungtod. Anhi sila manugway sa ilang baka ug kabaw kay labong kaayo ang mga balili dinhi nga mingkatap sa kiliran sa bungtod. Karong hapuna uban kanila ang gitugway nga mga baka. Apan karon sab hapuna manamilit na si Veronica kang Ricoy.
“Dili na mahitabo, Coy, uy! Ikaw ra man ang akong uyab,” mitindog si Veronica ug mipaingon sa gitugwayan sa iyang baka ug gibadbad ang pisi nga gihigot sa punoan sa bayabas.
Mitindog sab si Ricoy ug miduol kang Veronica. Gikuptan niya ang suwang sa dalaga ug gihagkan ang mga ngabil niini. Mipiyong si Veronica nga ingon sa gusto pang dugayon ni Ricoy ang usa ka halok sa pasiunang kamingaw. Ug nag-akob ang ilang mga ngabil. Dihay tingog nga morag migilis sa duol nilang duha. Tingog sa tibalas. Idlas kining langgama kay kon makita niyang moduol ka sa sanga nga iyang gibatugan, molupad man dayon kini. Human sa tibalas mibanos pag-awit ang siloy.ug dayon nagpanamilitay silang duha.
Wala dangtig dugay didto na si Veronica sa ubos, nagsunod sa iyang duha ka buok baka. Dihay luha sa mga mata ni Ricoy, mga luha sa kahaw-ang ug kamingaw sa babaye nga maoy una niyang gugma. Taudtaod miunga ang iyang turong kabaw. Kay misawop na man ang Adlaw nakahukom siya nga mopauli na lang sab. Kalit lang nga namingaw ang bungtod sa iyang pagpatighulog sa ubos.
UNOM ka tuig si Veronica sa Manila ug ning maong gidugayon wa gihapon siya wad-a ni Ricoy sa iyang panumdoman. Gihandom gihapon ni Ricoy si Veronica sama sa iyang paghandom kanunay sa bungtod. Nahibawo siya nga nahiuli na si Veronica gikan sa Manila. Apan ning iyang pagpauli may kuyog siyang usa ka kuwatro anyos nga batang babaye. Sumala sa usa ka silingan ni Veronica, ang bata anak ni Veronica. Nadisgrasya si Veronica sa dapit nga iyang gitrabahuan. Ug ang lalake nga maoy misapli sa iyang kaputli wala motuman sa iyang kaakuhan. Milayas kini biniyaan si Veronica nga nagmabdos pa sa bunga sa ilang pagminahalay.
Karon ania silang duha Veronica sa bungtod.
“Pasayloa ko, Coy!” matod ni Veronica. “Nakasala ko nimo. Nagpatental kog laing lalake didto sa Manila.”
“Okey lang na, Ver. Importante nga nahibalik ka dinhi si sa atong tugwayanan og baka. Importante sab nga mapadako nimo imong anak ug mahatagan og maayong kaugmaon,” daw way kinabuhi nga namulong si Ricoy. Diha pa ang kasakit nga iyang gibati kay dili siya mao ang unang lalake nga mikutlo sa pagka bulak ni Veronica. Hinuon, nakadawat da siya sa maong kamatuoran kay si Veronica miangkon man sa iyang kasal-anan.
“Wala ka ba mingawa dinhi sa bungtod, Ver?” sukna ni Ricoy nga mitan-aw kang Veronica. “Dinhi ning abutanan ta kaniadto?”
“Matag adlaw, Coy, gihandom ko kining dapita. Unta sama sa atong gibuhat kaniadto, magkuyog lang ta gihapon dinhi, manugway og baka ug kabaw,” hinay ang tingog ni Veronica nga kahilakon.
Gikuptan ni Ricoy ang suwang ni Veronica ug gihagkan sa mga ngabil. Naggakos sila samtang naminaw sa awit sa siloy nga didto magbatog sa sanga sa kahoyng bagalnga.
(KATAPUSAN)