Osmeña mipasigarbo sa iyang agi batok drugs
Gipasigargbo ni Mayor Tomas Osmeña ang iyang kalampusan batok sa pagpuo sa ginadiling drugas ug ang pagkamatay gumikan sa police operation ngadto sa dagkong mga drug lord sa dakbayan atol sa iyang unang state of the city address (Soca).
Si Osmeña nagkanayon nga niabot og 20,000 gramos kun 20 ka kilo nga shabu balor nga og P240 milyones ang nasakmit sa kapulisan subay sa 2,535 ka police operation.
Ang maong operasyon niresulta sa pagkadakop sa 3,283 ka mga durogista diin 4,663 ka mga kriminal nga kaso ang ilang nasang-at batok sa mga dinakpan.
Gawas niini, matod pa ni Osmeña nga natiklo usab sa kapulisan ang silang Jeffrey “Jaguar” Diaz, ang giila nga labing dako nga drug lord sa Visayas ug si Rowen “Yawa” Secretaria nga napatay sa Bohol ug laing 7 ka mga drug lord.
“During my first 30 days in office, we neutralized nine out of the top 10 drug local drug dealers in our city,” matod ni Osmeña.
Ang mga operasyon nahitabo atol sa pagdumala ni PSSupt. Benjamin Santos ug PSSupt. Joel Doria, karon hepe sa Cebu City Police Office.
Atol sa pagpamulong ni Osmeña, wa makalikay sa iyang pagpangataki si kanhi mayor Michael Rama kinsa iyang gihulagway nga namatay na usab ang political career sa kanhi mayor sanglit iya kining gipilde sa niaging piniliay.
Gipasigarbo usab sa mayor nga usa ka tuig human siya niasumir, ang Commission on Audit way negatibo nga opinion batok sa City Government.
Gipahibawo usab sa mayor nga magpadayon ang Siyudad sa pagpanghatag og libreng tambal alang sa mga masakiton ubos sa long life program nga iyang gisugdan dihang niasumir siya isip mayor.
Gipikhan usab niya si Rama ug iyang gipaninglan asa na ang iyang koleksyon sa Estados Unidos alang sa Cebu City Medical Center, apan si Rama niingon nga wa siyay gihatag sanglit pulos kadto saad.
Wa usab makalinggawas sa iyang kastigo si Secretary Michael Dino bahin sa ilang managlahi nga baruganan batok sa Bus Rapid Transit diin matod pa ni Dino nga anti-poor ang maong proyekto .
Si Rama nihulagway kang Osmeña nga wa pa maka "move on" sa mga panghitabo ug hangtod karon padayon siyang giatake ug gipasanginlan nga anomaloso ang mga transaksyon sa iyang kanhi administrasyon.
Ang kanhi mayor nihagit kang Osmeña sa pagpasaka og kaso kon tinuod ang iyang mga alegasyon. Apan matod ni Rama nga nagpataka na lang og pasangil si Osmeña lakip na ang giingon nga adunay P6 billion nga deficit ang Siyudad.
Sa dayon nga human ni Osmeña sa iyang SOCA iyang gipasalamatan si Sr. Sto. Niño gumikan sa paghatag niini kaniya og maayong panglawas. /