DRIVERS ANGAY NA MAGMATNGON
Human maklaro ang implementing rules and regulations (IRR), ipatuman og balik sa Land Transportation Office (LTO) sugod karong Huwebes ang Anti-Distracted Driving Act sa tibuok nasod.
Dinhi sa Central Visayas, si Joel Maloloy-on, operations
chief sa LTO 7, nibutyag nga estoryahan pa sa ilang mga labaw unsaon pagpatuman sa Republic Act 10913 gumikan kay gi-deploy ang ilang mga sakop pagtabang pagpatunhay sa kadalanan sa nagpadayon nga mga tigom sa Association of Southeast Asian Nations (Asean).
Ang mga tigom gipaabot mahuman karong Dominggo.
Apan giseguro ni Maloloyon nga dul-an 500 ka mga deputized agents sa LTO 7 lukop rehiyon ang moayuda nila sa pagpatuman sa AntiDriving Act.
Gisuspenso ang implementasyon sa bag-ong balaod sa miaging buwan subay sa hangyo sa mga senador ug kongresista samtang nagumol og technical working group ang Department of Transportation nga maoy nagtuon sa IRR sa RA 10913.
Si Maloloy-on namahayag nga gisuspenso ang pagpatuman sa ADDA aron mapalapdan ang information dissemination campaign ngadto sa publiko.
Ubos sa bag-ong balaod, dakpon ang drayber nga masakpan naggamit og mobile device o ubang gadget samtang nag-andar ang gimaneho nga sakyanan, nihunong sa stop light o naa sa intersection.
Gitakda usab sa balaod nga dapat klaro ang windshield ug way ibitay o ibutang sa dashboard.
Kon dunay nakabutang, kinahanglan nga di kini molapas sa sukod nga upat ka pulgadas gikan sa ubos sa dashboard.
Ang drayber tugotan makagamit og mobile device alang sa emergency nga tawag apan kinahanglan mopadaplin kini sa dan ug di makababag sa ubang mga sakyanan o makalapas sa mga lagda sa trapiko.
Ubos sa IRR, ang pagtawag og emergency gitugot sa sitwasyon diin nameligro ang kinabuhi sa tawo sama sa mga krimen, aksidente, hulga sa pagpamomba o terorista, sunog o mga higayon nga nanginahanglan og dinaliang medikal nga pagtagad o nameligro ang seguridad.
Ang drayber nga nagmaneho tugotan nga makatawag apan kinahanglan nga di kini maggunit sa mobile device kondi pinaagi sa earphones ug speaker phones ug nga kini wala makababag sa iyang panan-aw.
Way nausab sa multa batok sa mga makalapas niini. Sa unang paglapas, P5,000; P10,000 sa ikaduhang paglapas; P15,000 sa ikatulong paglapas uban sa tulo ka buwan nga suspension sa lisensiya sa drayber.
Kon mosobra sa tulo ka paglapas, bakwion ang lisensiya sa drayber ug pamultahon kini og P20,000.
Ubos sa balaod, tanang pribado ug publikong mga sakyanan sa tibuok nasod ang sakop niini sama sa bisikleta, pedicab, trolley, habalhabal, kuliglig, wagons, carts nga magdagan sa kadalanan o highways.