Globe pahatagon og hinabang sa lalake nga namatay

Mimando ang konseho sa dakbayan sa Talisay sa Globe Telecom nga mohatag og hinabang pinansyal ngadto sa batan-ong lalaki nga namatay human masangit ang liog sa nagbitay nilang kabli.

Sigun sa report sa Talisay Police ang nakasangit nga kabli iya sa Islacom Company nga karon napalit na Globe Telecom.

Si Philip Carlo Lao, 20, namatay human hapit maputol ang liog sa dihang nasangit sa nagbitay nga kable.

Samtang midangat usab sa tambalanan ang usa ka Nina Marie Delfino iyang hinigugma kinsa nag-angkas atol sa hitabo.

Nahitabo ang disgrasya niadtong gabii sa Hunyo 22 sa may Uldog St., Barangay Poblacion, dakbayan sa Talisay.

Atol sa session sa miaging semana si Konsehal Jojo Bacaltos miawhag sa sekretarya sa konseho nga padad-an og suwat ang taga Visayan Electric Company, mga cable company ug telephone company. Kagahapon sa atol sa session mitambong ang mga representative sa Philippine Long Distance Telephone Company (PLDT) ingon man sa Globe Telecom.

Si Lorenzo Elicanal Jr., pangu sa Visayas Assist Protection Division sa PLDT, miingon nga base sa ilang gihimong pakisusi di ila sa PLDT ang kable diin nasangit ang namatay.

Kini tungod kay base sa ilang nakita sa kabli ingon man report sa Talisay Police iya kini sa Islacom nga karon gipanag-iya na sa Globe Telecom. Tubag sa Globe Si Romeo Faunillan, field support head sa Central Visayas sa Globe Telecom, nibutyag nga mohimo silag report labot niini.

Samtang ilang ikonsulta ang ilang legal officer kon unsay angayang buhaton ilabi na sa tabang sa pamilya nga maoy gimando sa konseho nga matabangan ang pamilya sa namatay.

Iyang gibutyag nga aduna na silay plano sa ilang kompaniya paglimpyo sa ilang mga kabli ilabi na kadtong nagyunyon na.

Samtang si Achilles Borong, OIC Plan Operation sa PLDT Talisay, nibutyag nga aduna na usab silay plano nga molimpyo sa mga kabli nga wa na gamita ug nangaputol na.