Pulis nalutsan sa mga raliyesta
Mga militanteng pundok kalit nga mibutho ug malampuson nga nakapaduol sa venue sa ASEAN meeting bitbit ang ilang mga banner bisan pa man sa pagpangandam sa kapulisan sa Central Visayas nga nag-atang nang daan sa karsada.
Sayo pa sa buntag kagahapon giandam nang daan sa Police Regional Office (PRO) 7 ang crowd dispersal management (CDM) team kini aron mobabag sa mga raliyesta nga molusad og lihok protesta atubangan sa Radisson Blue hotel.
Ang dan Juan Luna paingun sa venue sa Asean summit wa na pasudli og mga pampublikong sakyanan samtang daghang police ang nag-atang nang daan sa dan aron dali nga mababagan ang mga raliyesta.
Apan wa mabantayi sa mga police ang di momenos 20 ka mga reliyesta nga misud sa SM City ug kalit lang nga mibutho kilid sa venue ug mipagawas sa ilang mga banner nga wa mabantayi sa mga police.
Usa sa ilang gisupak ang pag-host sa Pilipinas sa Asean summit kay alang kanila wa kini makatabang sa ekonomiya sa nasud ug naghatag lang kini og kalisud sa mga yanong Filipino.
Si John Ruiz sa Bayan Muna Central Visayas nagkanayon nga ilang gituyo nga pakalitan ang mga police tungod kay gipangandaman usab sila nga di makapaduol sa venue.
“Nakita man gud namo nga gipangandaman mi sa mga
police nga di mi makapaduol naghimo sab mi og paagi nga di sila kabantay namo,” matod ni Ruiz.
Giangkon ni P/SSupt. Joel Doria, hepe sa Cebu City Police Office, nga wa sila kabantay sa pag-abot sa mga militante sanglit nagtuo sila nga mag- shopping lang kini sa mall. “SM ito so hindi naman natin pigilan ang mga naglalakad dyan at saka ang mga
commuters ito sila nagpanggap na pupunta ng mall magsasakay ng sasakyan tapos biglang nag- converge dito,” matod Doria.
Gitugotan hinuon sila sa mga police nga makapadayag sa ilang gibati dungan sa paghangyo nga moundang sud sa pipila ka gutlo nga gisanong usab sa mga raliyesta.