Pagtanom og kalisang

Ang bugtong tumong sa terorismo mao ang pagtanom og kalisang sa katawhan pagkab-ot sa hataas nga katuyoang pulitikanhon, relihiyuso o ideolohiya nga ipaagi sa pagpatay og mga tawo.

Suma pa, nagsugod kining terorismo sa karaang panahon sa unang siglo sa pundok nga gitawag og Zealots nga ning-rebelde sa kagamhanang Romano sa Judea. Mabasa ni sa Bibliya.

Ang talaan sa kalibutan nagtug-an sad nga sa Rebulosyon sa Fransiya sa 17th century gihimo ang “Reign of Terror.” Ang lampingasang grupo nga Jacobins maoy nagpasiugda niini.

Panahon ni Emperador Napoleon Bonaparte sa mid 18th century may gipabutong bomba sa tuyo unta pagpatay kaniya apan ningkalas hinuon og 8 ka mga tawo ug nakaangol og 120 kabuok.

Apan ang organisasyon nga nag-una sa paggamit og mga bomba nga dinamita mao ang Irish radicals nga ningbatok sa England ug gisundan sa mga Russian anarchist. Maoy pag-imbento sa dinamita ni Alfred Nobel niadtong higayuna.

Busa kining terorismo di bag-o diin nanghingusog na karon sa Pilipinas. Kargado nila gikan sa mga Muslim terrorist groups. Ang mangtas mao ang Al-qaeda ni Bin Laden (Sept. 11,2001 New York disaster) ug karon ang ISIS extremists.

Di na ni pagsaw-pagsaw ang ilang kalihukan kay makiggubat na sa kagamhanan sama sa nahitabo karon sa Marawi City nga sa pagsuwat niini nagpadayon pa resulta ni sa palpak natong military intelligence.

Tiaw mo na ang ISIS pinaagi sa mga Maute nakapundo nag dako sa Lanao. Kon wa moulbo ang pamomba sa ISIS sa dapit magmata na lag buntag tawon ang militar. Kausik sa kinabuhi sa mga sundawo!

Husto ta to si Duterte nga tapuson niya ang gubat pinaagi sa pagpulbos sa mga Isis terorists. Apan naluoy siya sa nahabiling sibilyan nga maangin lamang. Ang angayng himuon unta mao ang massive evacuation.

Hatagan og ultimatum ang mga residente nga nag-ukonukon sa pagbakwit o nawili sa ilang kabtangan o nagsimpatiya sa ISIS. Hatagag timeframe aron maningkamot sila sa pag-eskapo.